নতুন দিল্লীৰ যন্তৰ-মন্তৰত চলি থকা চি জে পি (CJP)-ৰ প্ৰতিবাদ কাৰ্যসূচী ২৩ দিনত উপনীত হোৱাৰ সময়তে বিশিষ্ট শিক্ষাবিদ, উদ্ভাৱক আৰু পৰিৱেশ আন্দোলনকৰ্তা সোনম ৱাংচুকৰ স্বাস্থ্যৰ অধিক অৱনতি ঘটিছে। অনিৰ্দিষ্টকালীন অনশনৰ ১৫ দিন সম্পূৰ্ণ কৰা ৱাংচুকৰ ৰক্তচাপ পুনৰ হ্ৰাস পোৱাৰ লগতে অনশন আৰম্ভ কৰাৰ পাছৰে পৰা তেওঁৰ ওজন মুঠ ৭.৮ কিলোগ্ৰাম কমি যোৱা বুলি আন্দোলনকাৰীসকলে প্ৰকাশ কৰিছে।
আন্দোলনকাৰীসকলৰ প্ৰকাশ কৰা স্বাস্থ্য-তথ্য অনুসৰি, ৱাংচুকৰ ৰক্তচাপ ১০৪/৬৬ লৈ নামি আহিছে। চিকিৎসকসকলে তেওঁক নিবিড় পৰ্যবেক্ষণত ৰাখিছে যদিও তেওঁ অনশন ভংগ কৰিবলৈ অস্বীকাৰ কৰি আহিছে। তেওঁৰ মতে, দাবীসমূহৰ ক্ষেত্ৰত চৰকাৰৰ স্পষ্ট পদক্ষেপ নোহোৱালৈকে তেওঁ আন্দোলনৰ পৰা আঁতৰি নাযাব।
চি জে পি-য়ে অভিযোগ কৰিছে যে বিভিন্ন সৰ্বভাৰতীয় প্ৰতিযোগিতামূলক পৰীক্ষাত সংঘটিত হোৱা কেলেংকাৰী আৰু অনিয়মৰ বাবে কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানে নৈতিক দায় স্বীকাৰ কৰি পদত্যাগ কৰা উচিত। সংগঠনটোৰ প্ৰতিষ্ঠাপক অভিজিৎ দিপকে পুনৰ কয় যে শিক্ষাৰ্থীৰ স্বাৰ্থ সুৰক্ষাৰ ক্ষেত্ৰত চৰকাৰ ব্যৰ্থ হৈছে আৰু এই দাবী পূৰণ নোহোৱালৈকে আন্দোলন অব্যাহত থাকিব।
ইয়াৰ পূৰ্বেও আন্দোলনকাৰীসকলে দাবী কৰিছিল যে অনশনৰ প্ৰথম সপ্তাহতে ৱাংচুকৰ ওজন প্ৰায় ৫ কিলোগ্ৰাম হ্ৰাস পাইছিল। পিছলৈ এই হ্ৰাস ৭.৫ কিলোগ্ৰাম অতিক্ৰম কৰে আৰু বৰ্তমান সেয়া ৭.৮ কিলোগ্ৰামলৈ বৃদ্ধি পাইছে। যদিও শাৰীৰিকভাৱে দুৰ্বল হৈ পৰিছে, তথাপিও তেওঁ আন্দোলন অব্যাহত ৰাখিবলৈ মানসিকভাৱে দৃঢ় বুলি জনাইছে।
উল্লেখযোগ্য যে এই আন্দোলনৰ সূচনা হৈছিল শিক্ষাব্যৱস্থাৰ স্বচ্ছতা, পৰীক্ষাত হোৱা অনিয়মৰ তদন্ত আৰু দায়বদ্ধতা নিশ্চিত কৰাৰ দাবীৰে। সময়ৰ লগে লগে ইয়াত দেশৰ বিভিন্ন প্ৰান্তৰ শিক্ষাৰ্থী, সমাজকৰ্মী আৰু জনপ্ৰতিনিধিৰ সমৰ্থনো বৃদ্ধি পাইছে। অৱশ্যে চৰকাৰৰ ফালৰ পৰা এতিয়ালৈকে দাবীসমূহ সম্পূৰ্ণৰূপে মানি লোৱাৰ কোনো আনুষ্ঠানিক ঘোষণা অহা নাই।
