সুদীৰ্ঘ সময় ধৰি জনজাতিকৰণৰ নামত কেন্দ্ৰ আৰু ৰাজ্য চৰকাৰৰ প্ৰতাৰণাৰ বলি হৈ আহিছে অসমৰ ৬ জনগোষ্ঠী। জনজাতিকৰণৰ নিৰ্বাচনী প্ৰতিশ্ৰুতি দিয়া বিজেপি চৰকাৰেও প্ৰতাৰণা কৰিলে জনগোষ্ঠীকেইটাক।
যোৱা ৫ বছৰে বিষয়টো সমাধান নকৰি এতিয়া লোকসভা নিৰ্বাচনৰ আগমুহূৰ্তত বিষয়টো মীমাংসাৰ বাবে মন্ত্ৰী হিমন্ত বিশ্ব শৰ্মাৰ অধ্যক্ষতাত এক মন্ত্ৰী গোট গঠন হৈছিল।
অসমৰ জনজাতিকৰণৰ দাবীদাৰ জনগোষ্ঠীকেইটা সন্দৰ্ভত ১৫ ফেব্ৰুৱাৰিত কেন্দ্ৰক প্ৰতিবেদন দিয়াৰ কথা আছিল গোটটোৱে। কিন্তু স্বঘোষিত সময়সীমা পাৰ হৈ যোৱা পিছতো শনিবাৰ পৰ্য্যন্ত প্ৰতিবেদন দাখিল কৰা দূৰৰ কথা, প্ৰতিবেদন প্ৰস্তুতেই কৰা নাই মন্ত্ৰী গোটটোৱে।
“সকলো জাতি-জনগোষ্ঠী সংগঠনৰ সৈতে আলোচনা হ’ল। সকলোৰে মতসমূহ আহিল। আলোচনাৰ অন্তত এখন প্ৰতিবেদন প্ৰস্তুত কৰা হ’ব। সকলোৰে মতসমূহ বিভিন্ন ধৰণৰ হৈছে। ধৰি লওঁক চাহ জনগোষ্ঠীসকলৰ মাজত দুটা ভাগ হৈ গ’ল, কিছুমানক দিয়া হ’ল, কিছুমানক দিয়া হোৱা নাই। তেওঁলোকে তেওঁলোকৰ মতামত দুদিনমানৰ পাছত জনাম বুলি আমাক কৈছিল। তেওঁলোকৰ মতামতৰ বাবে আমি অপেক্ষা কৰি আছো।” ১৫ ফেব্ৰুৱাৰিত কেন্দ্ৰক দাখিলেই কৰিব লগা প্ৰতিবেদন ১৬ ফেব্ৰুৱাৰিলৈকে প্ৰস্তুতেই নকৰাৰ কথা স্বীকাৰ কৰি শনিবাৰে নৰ্থ ইষ্ট নাও-ত মন্তব্য মন্ত্ৰী গোটটোৰ সদস্য পল্লৱ লোচন দাসৰ।
লগতে পঢ়ক– জনজাতিকৰণ: ২৮ জানুৱাৰিৰ পৰা ধাৰাবাহিক আলোচনা, ১৫ ফেব্ৰুৱাৰিত প্ৰতিবেদন
কিন্তু মন্ত্ৰীজনৰ এই ভাষ্যৰ খণ্ডন কৰি আটছাৰ কেন্দ্ৰীয় সভাপতি ৰাজেন কুমাৰে যোৱা ৫ ফেব্ৰুৱাৰিৰ দিনাই তেওঁলোকৰ সকলো মতামত মন্ত্ৰী গোটৰ সৈতে হোৱা বৈঠকত জনাই দিয়া বুলি আমাৰ সাংবাদিকক জনায়।
“আমাৰ চাহ জনগোষ্ঠীৰ ১৩৮টা উপ-গোষ্ঠী আছে। তাৰে ৩৬টাক জনজাতিকৰণ দিয়াৰ কথা চৰকাৰে কৈছিল যদিও আমি সকলোকে একেলগে জনজাতিকৰণ দিবৰ বাবে আলোচনাৰ সময়ত স্পষ্ট কৰি দিছো।” আমাৰ সাংবাদিকৰ আগত এইদৰে কয় ৰাজেন কুমাৰে।
তেওঁ লগতে জনজাতিকৰণৰ নামত বিজেপি চৰকাৰে চাহ জনগোষ্ঠীৰ মাজত বিভাজন আনিবলৈ চেষ্টা কৰা বুলি মন্তব্য কৰাৰ লগতে ‘নাটক’ আখ্যা দিয়ে জনজাতিকৰণ প্ৰক্ৰিয়াটো।
আনহাতে বহুল চৰ্চাৰ পিছতো সদ্যসমাপ্ত ৰাজ্যসভা অধিৱেশনতো উত্থাপন নকৰিলে জনজাতিকৰণৰ বিধেয়ক। ইয়াৰোপৰি, অসমৰ ৬ জনগোষ্ঠীৰ লোকসকলে জনজাতিকৰণৰ বিধেয়কখন গৃহীত কৰি জনজাতিকৰণৰ মৰ্য্যদা প্ৰদান কৰিব বুলি আশাৰে বাট চাই আছিল যদিও সেয়া আশা হৈয়ে ৰ’ল।
ইফালে জনজাতিকৰণ সন্দৰ্ভত বিজেপি চৰকাৰৰ স্থিতিক লৈ প্ৰতিক্ৰিয়া প্ৰকাশ কৰিছে প্ৰাক্তন মুখ্য মন্ত্ৰী তৰুণ গগৈয়ে।
শনিবাৰে দিচপুৰস্থিত বাসভৱনত এক সংবাদমেল সম্বোধন কৰি গগৈয়ে জনজাতিকৰণৰ প্ৰসংগ উত্থাপন কৰি কয় “৬ জনগোষ্ঠীক জনজাতিকৰণৰ নামত আমাৰ মাজত কাজিয়া লগাই দিলে চৰকাৰখনে। পুৰণা ট্ৰাইবেল আৰু নতুন ট্ৰাইবেলৰ নামত এটা সংঘাত সৃষ্টি কৰি দিলে।”
“পাঁচবছৰ হ’বলৈ হ’ল, ৰাজ্যসভাৰ অধিৱেশনত বিলখন নানিলে কিয়?” বিজেপি চৰকাৰৰ প্ৰতি পোনপটীয়া প্ৰশ্ন কৰি গগৈয়ে লগতে কয় “যদি বিলখন ৰাজ্যসভাত উত্থাপন কৰিলেহেঁতেন লেপছ নহ’লহেঁতেন।”
গগৈৰ লগতে প্ৰশ্ন: “হিমন্ত বিশ্ব শৰ্মাৰ নেতৃত্বত কমিটি গঠন হ’ল, কমিটিৰ প্ৰতিবেদন কাক দিব এতিয়া?”
এইখনক এক ভেকোভাওনা বুলি অভিহিত কৰি গগৈয়ে “ঠগিলে সকলোকে” বুলি কয়। “জনজাতিকৰণৰ বিলখন অসমলৈ নানিলে, অৰুণাচললৈ আনিলে। অৰুণাচলৰ দুটা নে তিনিটা জনজাতিকৰণ কৰি দিছে, অসমত কিয় জনজাতিকৰণ কৰি দিব নোৱাৰিলে?” গগৈয়ে এইদৰে সংবাদমেলত কয়।
ইয়াৰোপৰি, লোকসভা আৰু বিধানসভা নিৰ্বাচনৰ পূৰ্বে “জনজাতিকৰণ দিয়া হ’ব” বুলি বিজেপি দলে দিয়া প্ৰতিশ্ৰুতি উনুকিয়াই দিয়ে তেওঁ।
আনহাতে, অহা ২০ ফেব্ৰুৱাৰিৰ দিনা বিজেপি চৰকাৰৰ প্ৰতাৰণাৰ প্ৰতিবাদত ৰাজ্যৰ সমূহ জিলা উপায়ুক্তৰ কাৰ্য্যালয়, মহকুমাধিপতিৰ কাৰ্য্যালয়ৰ সন্মুখত ধৰ্ণা কাৰ্য্যসূচী ৰূপায়ণ কৰিব আক্ৰাছুৱে।
কোচ ৰাজবংশী ছাত্ৰ সন্থাৰ সাধাৰণ সম্পাদক গোকুল বৰ্মণে অধ্যাদেশৰ জৰিয়তে হ’লেও জনজাতিকৰণ লাগিব বুলি দাবী কৰি লগতে কয় “অন্যথা কোচ ৰাজবংশী অধ্যুষিত অঞ্চলত মোদী চৰকাৰ হতাও, কোচ ৰাজবংশী বচাও আৰু বিপিএফ হতাও, কোচ ৰাজবংশী বচাও অভিযান চলাম।”
আনহাতে, ৰাজ্য চৰকাৰে ১৫ ফেব্ৰুৱাৰিৰ দিনা কেন্দ্ৰীয় চৰকাৰলৈ প্ৰতিবেদন নপঠোৱাৰ বাবে তীব্ৰ ভাষাৰে গৰিহণা দিয়ে ৬ জনগোষ্ঠীৰ নেতৃবৃন্দই।
বিজেপিয়ে ৬ জনগোষ্ঠীক জনজাতিকৰণৰ বাবে তিলমানো ইচ্ছা প্ৰকাশ কৰা নাই বুলি মন্তব্য কৰাৰ উপৰিও ইয়াক এক ‘নিৰ্বাচনী বৈতৰণী পাৰ হোৱা টোপ’, আৰু ‘নাটক’ আখ্যা দিছে চুতীয়া ছাত্ৰ সন্থা আৰু মৰাণ ছাত্ৰ সন্থাই।
