মহানগৰীৰ ভঙাগড়ৰ উৰণীয়া সেতুৰ তলৰ এখন মোবাইল দোকানৰ পৰা যোৱা ২৩ এপ্ৰিলৰ নিশা প্ৰায় ১০ লাখ টকাৰ মোবাইল চুৰি হোৱা বুলি বাতৰি প্ৰকাশ পাইছিল।
পিছে চুৰি হোৱা মোবাইলসমূহ দোকানৰ স্বত্বাধিকাৰীৰ ঘৰতে উদ্ধাৰ হোৱা ঘটনাই এতিয়া চাঞ্চল্যৰ সৃষ্টি কৰিছে।
কালি (শনিবাৰে) নিশা ভঙাগড় আৰক্ষীয়ে মোবাইল ষ্ট’ৰটোৰ স্বত্বাধিকাৰী তপন ভুঞাৰ বাসগৃহত অভিযান চলাই ‘চুৰি হোৱা’ মোবাইলসমূহ জব্দ কৰে।
ঘটনা সন্দৰ্ভত জানিবলৈ দি ভঙাগড় থানাৰ ভাৰপ্ৰাপ্ত আৰক্ষী বিষয়া খৰ্গেশ্বৰ ৰাভাই আমাৰ সাংবাদিকক কয় “লোকজনৰ বেছিভাগ মোবাইল ঘৰতে আছে। সেই মোবাইলখিনিৰ ষ্টক ৰেজিষ্টাৰ আৰু চে’লছ ৰেক’ৰ্ড আমি বিচাৰিছো যদিও তেওঁ দিব পৰা নাই। আমাৰ এইটো স্বত্ত্বাধিকাৰীৰ এটা পৰিকল্পনা যেন লাগে।”
আৰক্ষীয়ে কালি নিশা ভূঞাক বাৰম্বাৰ সোধা পোছা কৰাৰ পাছত তেওঁ মোবাইলখিনি ঘৰতে থকা স্বীকাৰ কৰে। অৱশ্যে বৰ্তমানলৈকে দোকানখনৰ স্বত্ত্বাধিকাৰী তপন ভূঞাক গ্ৰেপ্তাৰ কৰা নাই আৰক্ষীয়ে।
উল্লেখযোগ্য যে, যোৱা ২৩ এপ্ৰিলৰ নিশা মোবাইল চুৰি হোৱা বুলি ভূঞাই সংবাদমাধ্যমত জনাইছিল আৰু চোকা অস্ত্ৰৰে তলা কাটি তথা গ্লাছৰ দৰ্জা ভাঙি চোৰে মোবাইল লৈ যোৱা বুলি কৈছে।
লগতে পঢ়ক ল’কডাউনৰ মাজতে গুৱাহাটীত ১০ লাখ টকাৰ মোবাইল চুৰি
কিন্তু সৰিয়হৰ ডুলিতে ভূতৰ দৰে অতি নাটকীয়ভাৱে তেওঁৰ বাসগৃহত মোবাইলখিনি উদ্ধাৰ হোৱাত এতিয়া বিষয়টো অধিক ৰহস্যঘন হৈ উঠাৰ লগতে কি উদ্দেশ্যেৰে তেওঁ মোবাইল চুৰি হোৱাৰ নাটক ৰচিছিল তাক লৈও এতিয়া প্ৰশ্ন উঠিছে।
