Supreme Court যৌন নিৰ্যাতনৰ ক্ষেত্ৰত শৰীৰ স্পৰ্শ নকৰিলেও সেয়া পকছো (POCSO) আইনৰ আওতাত পৰিব। উচ্চতম ন্যায়ালয়ে এইকথা স্পষ্ট কৰি দিছে।
বোম্বে উচ্চ ন্যায়ালয়ৰ নাগপুৰ বিচাৰপীঠে এটা ৰায় দিছিল যে ছালৰ সৈতে ছালৰ স্পৰ্শ নহ’লে সেয়া পকছো আইনৰ আওতাত নপৰে। বোম্বে উচ্চ ন্যায়ালয়ৰ সেই ৰায়ৰ সন্দৰ্ভতে এইবাৰ কঠোৰ মত প্ৰকাশ কৰিলে উচ্চতম ন্যায়ালয়ে।
বৃহস্পতিবাৰে উচ্চতম ন্যায়ালয়ৰ তিনিগৰাকী ন্যায়াধীশ ইউ ইউ ললিত, এছ ৰবীন্দ্ৰ ভাট আৰু বেলা ত্ৰিবেদীৰ বিচাৰপীঠে মন্তব্য কৰি কয়,’’দেহৰ ছালৰ সৈতে ছালৰ স্পৰ্শ ইত্যাদি কথাৰে গুৰুত্বপূৰ্ণ এখন আইনৰ কাৰ্যকৰিতাক ক্ষুদ্ৰ কৰি তোলা হৈছে। শিশুসকলক যৌন নিৰ্যাতনৰ পৰা ৰক্ষা কৰিবলৈ প্ৰস্তুত কৰা পকছো আইন মষিমূৰ কৰা হৈছে।‘’
উল্লেখ্য যে বোম্বে উচ্চ ন্যায়ালয়ৰ নাগপুৰ বিচাৰপীঠৰ ন্যায়াধীশ পুষ্পা গানেদিৱালাৰ দুটা ৰায়ক লৈ শেহতীয়াকৈ তুমুল বিতৰ্কৰ সৃষ্টি হৈছে।
Also Read: জ্যেষ্ঠ সাংবাদিক, আপকুৰ প্ৰতিষ্ঠাপক সাধাৰণ সম্পাদক ভৱেশ বৰুৱাৰ পৰলোকপ্ৰাপ্তি
ইয়াৰে এটা ৰায়ত তেওঁ কৈছিল যে পোছাকৰ ওপৰেৰে শৰীৰত হাত দিলে সেয়া পকছো আইনৰ আওতাত যৌন নিৰ্যাতন বুলি ধৰা নহ’ব। যৌন নিৰ্যাতনৰ অভিপ্ৰায়েৰে ছালৰ সৈতে ছালৰ সংস্পৰ্শ হ’লেহে তাক যৌন নিৰ্যাতন বুলি ধৰা হ’ব।
সেইদৰে, আন এক গোচৰৰ ৰায়ত তেওঁ কৈছিল যে কোনো নাবালিকাৰ হাতত ধৰা বা পেন্টৰ চেইনখোলা পকছো আইনত যৌন নিৰ্যাতন নহয়।
যোৱা ২৭ জানুৱাৰীত উচ্চতম ন্যায়ালয়ে এই ৰায়ৰ ওপৰত স্থগিতাদেশ জাৰি কৰিছিল। বোম্বে উচ্চ ন্যায়ালয়ৰ বিতৰ্কিত ৰায়ক লৈ বৃহস্পতিবাৰে উচ্চতম ন্যায়ালয়ৰ তিনিগৰাকী ন্যায়াধীশে কঠোৰ মন্তব্য কৰে।
তেওঁলোকে কয়, ‘’ যৌন নিৰ্যাতনৰ অভিপ্ৰায়েৰে পোছাক বা আন ধৰণে শৰীৰ স্পৰ্শ কৰাৰ সম্পৰ্কত পকছো আইনত স্পষ্ট কৰা আছে। যিটো সহজভাৱে কোৱা আছে বোম্বে উচ্চ ন্যায়ালয়ে সেই বিষয়ে অস্পষ্ট মন্তব্য কৰিব নোৱাৰে। সংকীৰ্ণ মন্তব্যৰ ফলত এই আইনৰ উদ্দেশ্য ব্যৰ্থ হ’ব।‘’
Also Read: শ্ৰীনগৰ এনকাউণ্টাৰৰ তদন্ত ঘোষণা জম্মু-কাশ্মীৰ প্ৰশাসনৰ
উল্লেখ্য যে যোৱা ১২ জানুৱাৰীত বোম্বে উচ্চ ন্যায়ালয়ৰ নাগপুৰ বিচাৰপীঠে দিয়া ৰায়ৰ বিৰোধিতা কৰি উচ্চতম ন্যায়ালয়ত আবেদন জনাইছিল এটৰ্ণি জেনেৰেল কে কে বেনুগোপাল, ৰাষ্ট্ৰীয় মহিলা আয়োগ আৰু মহাৰাষ্ট্ৰ ৰাজ্যই।
বৃহস্পতিবাৰে এই আবেদনৰ ভিত্তিতে উচ্চতম ন্যায়ালয়ৰ তিনিগৰাকী ন্যায়াধীশে বিষয়টো সন্দৰ্ভত এইদৰে কঠোৰ মত প্ৰকাশ কৰে।
