সাংসদ-বিধায়কে ধনৰ বিনিময়ত ভোটদানৰ গোচৰত ৰেহাই নাপাব। সোমবাৰে উচ্চতম ন্যায়ালয়ে এক ঐতিহাসিক ৰায়দানত এইদৰে কয়। সংসদ হওক বা বিধানসভা হওক, আইন প্ৰণেতাসকল আৰু উৎকোচৰ অভিযোগৰ পৰা মুক্ত নহ’ব। মুখ্য ন্যায়াধীশ ডি ৱাই চন্দ্ৰচুড়ৰ নেতৃত্বত উচ্চতম ন্যায়ালয়ৰ সাতজনীয়া সাংবিধানিক বিচাৰপীঠে আজি এই ৰায়দান কৰে।
১৯৯৮ চনত পি ভি নৰসিংহ ৰাও গোচৰত পাঁচজনীয়া বিচাৰপীঠে ৩:২ সংখ্যাগৰিষ্ঠতাৰে ৰায় দিছিল যে সংবিধানৰ ১০৫(২) আৰু ১৯৪(২) অনুচ্ছেদ অনুসৰি সাংসদ বা বিধায়কে ভাষণ দিয়া বা ভোটদানৰ পৰিৱৰ্তে উৎকোচ ল’লে বিশেষ ৰেহাই পাব পাৰে। তেওঁলোকৰ বিৰুদ্ধে গোচৰ চলাব নোৱাৰিব। এনে অভিযোগত সাংসদ-বিধায়কসকল ৰেহাইৰ যোগ্য। আজি উচ্চতম ন্যায়ালয়ৰ বৃহত্তৰ বিচাৰপীঠে পূৰ্বৰ ৰায় বাতিল কৰে।
লগতে পঢ়কঃ কাৰাগাৰত সশস্ত্ৰ আক্ৰমণ চলাই ৪ হাজাৰ কয়দীক উলিয়াই নিলে দুৰ্বৃত্তই!
বিচাৰপীঠে ৰায়দানত কয় যে বিধায়ক-সাংসদৰ বিৰুদ্ধে দুৰ্নীতি আৰু উৎকোচৰ অভিযোগে সংসদীয় প্ৰক্ৰিয়াৰ প্ৰতি মানুহৰ বিশ্বাস শেষ কৰি দিব পাৰে। দুৰ্নীতি আৰু উৎকোচ সংবিধানৰ মৌলিক উদ্দেশ্যৰ পৰিপন্থী।
সংবিধানৰ কথা উল্লেখ কৰি বিচাৰপীঠে আৰু কয় যে দেশৰ সংবিধানে নিৰ্বাচিত প্ৰতিনিধিসকলক নিৰ্ভয়ে কাম কৰাৰ অধিকাৰ প্ৰদান কৰিছে। দুটা ধাৰাত সেই সন্দৰ্ভত জনপ্ৰতিনিধিক আইনী ৰক্ষাকৱচ প্ৰদান কৰা হৈছে। কিন্তু, এই দুটা ধাৰাৰ পূৰ্বৰ ৰায়দানত ভুল ব্যাখ্যা কৰা হৈছিল বুলি বৃহত্তৰ সংবিধান বিচাৰপীঠে কয়।
উচ্চতম ন্যায়ালয়ৰ মুখ্য ন্যায়াধীশে কয় যে আমি পূৰ্বৰ ৰায়দানৰ সৈতে একমত নহয়। এই বিচাৰপীঠে খণ্ডন কৰে যে জনপ্ৰতিনিধিয়ে ভোটদান বা সভাত কথা কোৱাৰ বিনিময়ত ধন লোৱাৰ অভিযোগৰ পৰা মুক্ত হ’ব পাৰে।
লগতে পঢ়কঃবিজেপিক তীব্ৰ প্ৰত্যাহ্বনেৰে বিহাৰত I.N.D.I.A.ৰ বিশাল জনসভা; বজালে নিৰ্বাচনী ৰণশিঙা
উল্লেখ্য যে ১৯৯৩ চনৰ জুলাই মাহত লোকসভাত হোৱা অনাস্থা ভোটৰ পৰা ‘সংখ্যালঘু’ চৰকাৰখন অতি সংকীৰ্ণ ব্যৱধানত বৰ্তি যায়। চৰকাৰে ২৫১টা ভোটৰ পৰিৱৰ্তে ২৬৫টা ভোটহে লাভ কৰে। এবছৰৰ পাছত জনা যায় যে ঝাৰখণ্ড মুক্তি মৰ্চাই নৰসিংহ ৰাওৰ চৰকাৰক ধনৰ বিনিময়ত সমৰ্থন কৰিছিল।
