সেইদিনা দহ হাজাৰ যুৱক-যুৱতীয়ে একেলগে মাদলৰ কোবে কোবে ঝুমুৰ নৃত্য কৰিছিল।দেখি ইমান ভাল লাগিছিল! কি এক দৃষ্টি নন্দন দৃশ্য। কিন্তু তেতিয়াই মোৰ মনলৈ এটা প্ৰশ্ন আহিছিল- কলাৰ উদ্দেশ্য কি? কিয়, কলাই জীৱনৰ কথা কয়। কলাৰ সুৰ, লয় সৌন্দৰ্যই আমাক আকৰ্ষণ কৰে। কলাৰ আবেদন দুই প্ৰকাৰৰ-এক বাহ্যিক আৰু আন এক আভ্যন্তৰীণ, অন্তৰ্মুখী। বাহ্যিক আবেদন, কলাৰ শৰীৰ আৰু অন্তৰ্মুখী আবেদন কলাৰ আত্মা। সাধাৰণতে খুব কম লোকেহে কলাৰ অন্তৰ্মুখী আবেদন ধৰিব পাৰে। বেছিভাগ সময়তে আমি বাহিৰৰ সুৰ, লয় সৈন্দৰ্যতে নিমগ্নহৈ থাকোঁ। মই কিয় হঠাৎ কলাৰ বৈশিষ্ট্যৰ বিষয়ে আলোচনা কৰিবলৈ ল’লো? গুৱাহাটীত এডভান্টেজ আসাম হৈ গ’ল। দেশৰ প্ৰধানমন্ত্ৰী আৰু মন্ত্ৰী মণ্ডল অসমলৈ আহিল। দেশৰ প্ৰথম শাৰীৰ উদ্যোগপতি আদানী, আম্বানী আহিল। তাতে আমাৰ আদীবাসী ভাই-ভণী সকলে উল্লাসেৰে ঋুমুৰ নাচিলে। এই গোটেই কথাটোত কিবা এটা বৈপৰীত্য আমাৰ চকুত নপৰেনে? অসমৰ চাহ বাগিছাত কাম কৰা আদিবাসী মূলৰ এই লোকসকল কোন? তেওঁলোক কিয় অসমলৈ আহিছিল? কোনে তেওঁলোকক অসমলৈ আনিছিল? বৃটিছে চাহ বাগিছাত শ্ৰমিক হিচাপে কাম কৰিবলৈ আজিৰ পৰা ১৫০/২০০ বছৰ আগতে ভাৰতৰ বিভিন্ন ঠাইৰ পৰা তেওঁলোকক অসমলৈ আনিছিল। নিজৰ ব্যাৱসায়িক স্বাৰ্থত কিমান কৌশলে, নানা ৰঙীণ সপোন দেখুৱাই এই লোকসকলক অসমলৈ অনা হৈছিল। অসম পোৱাৰ পিছতহে, তেওঁলোকে গম পাইছিল, কি উদ্দেশ্যেৰে তেওঁলোকক অনা হৈছিল। চাহ বাগানত কৃতদাসৰ দৰে সামান্য মজুৰিত তেওঁলোকক হাড় ভঙা পৰিশ্ৰম কৰিবলৈ বাধ্য কৰোৱা হৈছিল। সেই তেতিয়াও সপোন আছিল উন্নয়নৰ। অমলেন্দু গুহৰ ‘Planter Raj To Swaraj’ আৰু অৰূপা পটংগিয়া কলিতাৰ ‘জছনাৰ ঝিটাছ’আৰু অন্য বহু কিতাপত বৰ্ণিত হৈছে চাহ বাগানত কাম কৰা আদিবাসী লোক সকলৰ জীৱনৰ শোষণ নিস্পেষণৰ মৰ্ম্মন্তুদ কাহিনী। সেই কাহিনীৰে এতিয়া পুনৰাবৃত্তি হোৱা নাইনে এডভেন্টজ আসামত? আজি দুদিনমান বাতৰিকাকতৰ প্ৰথম পৃষ্ঠা ভৰি আছিল অসমত কোনে কিমান হাজাৰ কোটি টকা বিনিয়োগ কৰি অসমক নদন বদন কৰি তুলিব তাৰ খবৰেৰে।এই এডভেন্টজ আসামে কেৱল যে আদিবাসী মূলৰ লোক সকলৰ জীৱনলৈয়ে বিপদ মাতি আনিব তেনে নহয় ই অসমীয়াৰ, বিশেষকৈ প্ৰান্তীয় বৰ্গৰ, দুখীয়া নিচলা লোকৰ জীৱন দুৰ্বিষহ কৰি তুলিব। কিয় আৰু কেনেকৈ? এই বিনিয়োগৰ অৰ্থ কি? এই বিনিয়োগৰ অৰ্থ তিনিটা।
প্ৰথম, আমাৰ প্ৰাকৃতিক সম্পদ, মানে আমাৰ পাহাৰ পৰ্বত, মাটি, পানী, বায়ু,নদ-নদী, অৰণ্য সকলো এতিয়া বণিয়াক গতাই দিয়া হ’ব। দ্বিতীয়, তাৰ কাৰণে কাক ক’ৰ পৰা উচ্ছেদ কৰা হ’ব তাৰ কোনো ঠিকনা নাই। যোৱা সময়ছোৱাত উন্নয়নৰ নামত ক’ত কিমান লোকক উচ্ছেদ কৰা হৈছে আমি দেখি আছোঁ। কাচাৰৰ দুলু চাহ বাগানৰ কথা আমাৰ স্মৃতিত এতিয়াও দগদগীয়াহৈ আছে। কাৰ্বি আংলঙত তেওঁলোকে ১৮ হাজাৰ বিঘা মাটি সৌৰ শক্তি উৎপাদনৰ কাৰণে অধিগ্ৰহণ কৰাৰ পৰিকল্পনা কৰিছে। মাজতে চান্দডুবিৰ ওচৰৰ মাটিত কাৰোবাৰ চকু পৰিছিল। গিবন অভয়াৰণ্য তচনচ কৰি এতিয়া তেওঁলোকে তেল উলিয়াব। আমি দেখিছোঁ এখনৰ পিছত এখন চাহ বাগান কাৰ হাতলৈ গৈ আছে। বৃটিছে চাহখেতি কৰিবলৈ এসময়ত হাজাৰ হাজাৰ লাখ লাখ বিঘা মাটি অধিগ্ৰহণ কৰিছিল।এতিয়া অসম চৰাকাৰ সহযোগত সেই কাম কৰিছে বহুজাতিকে। অসম চৰকাৰ মানে চৰকাৰৰ এচাম মন্ত্ৰী/ এম এল এ আৰু শক্তিশালী আমোলাৰ এটা জোট। গতিকে এডভেন্টেজ আসাম হৈছে এই জোটটো। তাত গোট খোৱা মানুহ বোৰ আপোনালোকে দেখা নাই জানো?
তৃতীয়, কথাটো হ’ল এডভান্টেজ আসামৰ দৰ্শন বা দৃষ্টিভংগী। উলম্ব ইন্নয়নৰ আৰ্হি। এফালে যধেমধে প্ৰাকৃতিক সম্পদ আাহৰণ কৰি আমাৰ পৰিৱেশতন্ত্ৰলৈ বিপদ মাতি অনা আৰু আনফালে শ্ৰমিকক শোষণ কৰি অৰ্থনৈতিক অসমতা বৃদ্ধি কৰা।জলবায়ু পৰিবৰ্তনৰ ফলত উত্তৰ-পূৱ ভাৰতৰ ৰাজ্য সমূহ আটাইতকৈ বেছি ক্ষতিগ্ৰস্থ হ’ব বুলি কিয় এখনৰ পিছত এখন প্ৰতিবেদন প্ৰকাশ পাই আছে? তাৰ মূল কাৰণ হ’ল উন্নয়নৰ নামত ইতিমধ্যে আমাৰ অঞ্চলটো ফোপোলা কৰি পেলোৱা হৈছে।নদী বান্ধ, কয়লা খনন, তেল উৎপাদন, ৰাজপথ নিৰ্মাণকে ধৰি নানা উন্নয়ন প্ৰকল্পই ইতিমধ্যে আমাৰ অঞ্চলটোৰ পৰিৱেশতন্ত্ৰৰ বিস্তৰ ক্ষতিক্ষাধন কৰিছে। গতিকে এই হাজাৰ কোটি লাখ কোটি টকাৰ বিনিয়োগে, যিখিনি ৰৈছেগৈ, সেইখিনিও শেষ কৰিব। আৰু এটা কথা, আদানী-আম্বানী আৰু অন্য পুঁজিপতি, উদ্যোগপতি সকলক বাৰু কি ছুট-খৰে খাইছে যে তেওঁলোকৰ লাভ নোহোৱাকৈ তেওঁলোকে অসমত হাজাৰ হাজৰ কোটি টকা বিনিয়োগ কৰিব? তেওঁলোকে আমাক লুটি-পুটি খাবলৈহে ইয়াত ধন বিনিয়োগ কৰিবলৈ আহিছে। টাটা, আদানী-আম্বানীতকৈ বহু ভাল। কিন্তু টাটাক জাগীৰোড কাগজ কলৰ মাটি বোৰ কেনেকৈ দি দিয়া হ’ল আমি সকলোৱে দেখিছোঁ।আৰু চাকৰি? কি চাকৰি দিব তেওঁলোকে? পিয়ন চকীদাৰ আৰু কায়িক শ্ৰমৰ চাকৰি?
বৈপৰীত্য আৰু পৰিহাসটো এইটোৱেই যে তেওঁলোকে অমাক শোষণ কৰিবলৈ মেলা পাতিছে আৰু সেই মেলাতে ৰাগ টানিবলৈ নাচিবলৈ আমাকে মাতিছে। আৰু আমি নাচৰ নিচাত মতলীয়াহৈ আছোঁ। এতিয়া কোনোবাই ক’ব পাৰে? কি আমাক উন্নয়ন নালাগেনেকি? অলবৎ লাগে। আমাক পৰিৱেশ অনুকুল উন্নয়ন লাগে। আমাক বহনক্ষম উন্নয়ন লাগে। আমি ব্যক্তিগত খণ্ডৰ বিনিয়োগৰো বিৰোধিতা নকৰো। কিন্তু সেই বিনিয়োগ হ’ব লাগিব চৰকাৰৰ চৰ্ত সাপেক্ষে। চৰকাৰী আৰু ব্যক্তিগত খণ্ডৰ মাজত এক ভাৰসাম্য বজাই ৰাখিব পাৰিব লাগিব।উলম্ব উন্নয়নত মতলীয়াহৈ থাকিলে আমি নিগমে উচন হ’ম। আৰু এটা কথা, তেওঁলোকে গ্ৰীণ এনাৰ্জিৰ বিষয়ে এডভেন্টেজ আসামত আলোচনাচক্ৰ পাতিছে। লাজ নালাগে গ্ৰীণ এনাৰ্জিৰ কাৰণে আদানীয়ে দুৰ্নীতি কৰি যে এতিয়া আমেৰিকালৈ যাব নোৱাৰা হৈ আছে। লাজ নালাগে গ্ৰীণ এনাৰ্জিৰ নামত কাৰ্বি আংলঙত মানুহক উচ্ছেদ কৰি যে ১৮০০০ বিঘা মাটি বনিয়াক গতাব বিচাৰিছে। গ্ৰীণ এনাৰ্জি, নালাগে আমাক এনে গ্ৰীণ এনাৰ্জি।
