“কিছুদিন পূৰ্বে চৰকাৰে গুৱাহাটী চিকিৎসা মহাবিদ্যালয় হাস্পতালৰ মাচুল অস্বাভাৱিক হাৰত বৃদ্ধি কৰিছিল। এইবাৰ যোৰহাট চিকিৎসা মহাবিদ্যালয় হাস্পতালৰ ক্ষেত্ৰতো একেধৰণৰ সিদ্ধান্ত গ্ৰহণ কৰিছে। দুৰ্গা পূজাৰ পিচৰ পৰা জেএমচি হাস্পতালৰ মাচুল বৃদ্ধিৰ সিদ্ধান্ত ৰাজ্যৰ দৰিদ্ৰ ৰোগীৰ ওপৰত মাধমাৰ স্বৰূপ। আমি যোৰহাট মেডিকেল কলেজ হাস্পতাল কৰ্তৃপক্ষৰ এই জনবিৰোধী সিদ্ধান্ত প্ৰত্যাহাৰ কৰিবলৈ দাবী জনাইছোঁ। ”
আজি আম আদমী পাৰ্টিৰ ৰাজ্যিক সভাপতি মনোজ ধানোৱাৰে এক প্ৰেছ বিজ্ঞপ্তি যোগে যোৰহাট মেডিকেল কলেজ হাস্পতালৰ মাচুল বৃদ্ধিৰ সিদ্ধান্ত প্ৰত্যাহাৰৰ দাবী জনাই এই অভিযোগ উত্থাপন কৰে যে মাহেকে-পষেকে হাজাৰ হাজাৰ কোটি টকা ঋণ লোৱা মুখ্যমন্ত্ৰী হিমন্ত বিশ্ব শৰ্মাৰ চৰকাৰে অৱশেষত ৰাজ্যৰ দৰিদ্ৰ জনসাধাৰণৰ ওপৰত কৰ-কাটল তথা অত্যধিক মাচুলৰ বোজা জাপি দিছে।
প্ৰেছ বিজ্ঞপ্তিত ধানোৱাৰে কয়, “চৰকাৰী হাস্পতালত এনে উচ্চ হাৰৰ মাচুল কোনো পধ্যেই গ্ৰহণযোগ্য নহয়। কিছুমান ক্ষেত্ৰত মাচুল দুগুণ, তিনিগুণলৈকে বৃদ্ধি কৰা হৈছে। এই সিদ্ধান্ত কাৰ্যকৰী হ’লে চৰকাৰী মেডিকেল কলেজ হাস্পতালৰ চিকিৎসা সেৱা আৰু নাৰ্চিং হোমৰ চিকিৎসা সেৱাৰ মাজত পাৰ্থক্য নোহোৱা হৈ পৰিব। ৰাজ্যখনত দৰিদ্ৰ আৰু নিম্ন আয়ৰ লোকে যিকোনো ধৰণৰ চিকিৎসা লাভৰ পৰা বঞ্চিত হ’ব। ”
আপৰ ৰাজ্যিক সভাপতি গৰাকীয়ে অসম চৰকাৰৰ স্বাস্থ্য বিভাগক দিল্লী আৰু পঞ্জাৱ চৰকাৰে আগবঢ়োৱা স্বাস্থ্য সেৱাৰ মডেল গ্ৰহণ কৰিবলৈ আহ্বান জনায়। সভাপতি ধানোৱাৰে দিল্লী আৰু পঞ্জাৱৰ আপৰ চৰকাৰে মহল্লা ক্লিনিকৰ জৰিয়তে উন্নত মানৰ বিনামূলীয়া চিকিৎসা সেৱা আগবঢ়োৱাৰ দৰে অসমতো মহল্লা ক্লিনিক স্থাপনৰ দাবী জনায়।
উল্লেখ্য যে যোৰহাট চিকিৎসা মহাবিদ্যালয় হাস্পতালৰ প্ৰস্তাৱিত মাচুলৰ নতুন নিৰিখ অনুসৰি ৰোগীৰ পঞ্জীয়ন মাচুল ১০ টকাৰ পৰা ২০ টকা, জেনেৰেল ৱাৰ্ডৰ বৰ্তমানৰ মাচুল ১০ টকাৰ পৰা ৫০ টকা, প্ৰসূতিৰ চিজাৰিয়ান অস্ত্ৰোপচাৰৰ বাবে পেয়িং কেবিন ১৮০০ টকাৰ পৰা ৩০০০ টকা, লেপাৰ’স্কপিক অপাৰেচন (জেনেৰেল ৱাৰ্ড)ৰ ৩ হাজাৰ টকাৰ পৰা ৫ হাজাৰ টকা, মেজৰ মুকলি অস্ত্ৰোপচাৰ ৬০০ টকাৰ পৰা ৬ হাজাৰ টকালৈ বৃদ্ধিৰ সিদ্ধান্ত গ্ৰহণ কৰিছে ।
