দেশত পেট্ৰ’ল, ডিজেল, এলপিজি বা খাৰুৱা তেলৰ কোনো ধৰণৰ অভাৱ নাই বুলি সোমবাৰে কেন্দ্ৰীয় চৰকাৰে স্পষ্ট কৰি দিছে। ইয়াৰ লগতে দেশৰ সাধাৰণ জনতাক কোনো কাৰণতে আতংকিত নহ’বলৈ চৰকাৰে বিশেষভাৱে আহ্বান জনাইছে। বৰ্তমান বিশ্বজুৰি চলি থকা উত্তেজনাৰ পৰিপ্ৰেক্ষিতত প্ৰধানমন্ত্ৰী নৰেন্দ্ৰ মোদীয়ে ইন্ধন সাশ্রয় কৰাৰ যি বাৰ্তা দিছিল, তাক লৈ দেশত ইন্ধনৰ সংকট হোৱা বুলি ভবাটো ভুল হ’ব বুলি চৰকাৰে মত প্ৰকাশ কৰিছে। বিশেষকৈ পশ্চিম এছিয়াৰ অস্থিৰ পৰিস্থিতিৰ মাজতো ভাৰতত পৰ্যাপ্ত পৰিমাণৰ ইন্ধন মজুত আছে বুলি কেন্দ্ৰই আশ্বস্ত কৰিছে।
আন্তৰ্জাতিক সংঘাতৰ ফলত দেশৰ অৰ্থনীতিত যাতে কোনো প্ৰভাৱ নপৰে, তাৰ বাবে কেন্দ্ৰীয় চৰকাৰে ইতিমধ্যে কেইবাটাও গুৰুত্বপূৰ্ণ পদক্ষেপ গ্ৰহণ কৰিছে। পেট্ৰ’লিয়াম আৰু প্ৰাকৃতিক গেছ মন্ত্ৰালয়ৰ যুটীয়া সচিবৰ মতে ভাৰতৰ হাতত এতিয়াও প্ৰয়োজন অনুসৰি খাৰুৱা তেল, গেছ আৰু পেট্ৰ’ল-ডিজেল মজুত আছে। যদিও ভাৰতৰ প্ৰায় ৯০ শতাংশ ইন্ধন বিদেশৰ পৰা আমদানি কৰিবলগীয়া হয় আৰু সেই অঞ্চলসমূহ বৰ্তমান সংঘাতৰ মাজেৰে পাৰ হৈছে, তথাপিও যিকোনো সমস্যাৰ মোকাবিলা কৰিবলৈ চৰকাৰ সম্পূৰ্ণ সাজু হৈ আছে।
চৰকাৰী বিষয়াসকলে জনোৱা মতে ইন্ধনৰ মজুতক লৈ চিন্তা কৰি মানুহে আগতীয়াকৈ তেল কিনি থোৱাৰ কোনো প্ৰয়োজন নাই। প্ৰধানমন্ত্ৰীয়ে দিয়া বাৰ্তাক কেৱল ইন্ধন সাশ্রয় আৰু বিশ্বব্যাপী অনিশ্চয়তাৰ মাজত দেশৰ আৰ্থিক বোজা হ্ৰাস কৰাৰ এটা প্ৰচেষ্টা হিচাপেহে গণ্য কৰা উচিত। চৰকাৰে জনাইছে যে যোগান ব্যৱস্থাত যাতে কোনো ব্যাঘাত নজন্মে তাৰ বাবে সকলো ব্যৱস্থা কৰা হৈছে। সেয়েহে অপ্ৰয়োজনীয় ভ্ৰমণ কম কৰা আৰু তেল সাশ্রয় কৰিবলৈ প্ৰধানমন্ত্ৰীয়ে কৰা অনুৰোধক কোনো সংকটৰ সংকেত হিচাপে লৈ আতংকিত নহ’বলৈ জনসাধাৰণক আহ্বান জনোৱা হৈছে।
