মাজ নিশা এটা বিদ্যুৎ কেন্দ্ৰত সংঘটিত হয় এক ভয়ংকৰ বিস্ফোৰণ। চকুৰ পলকতে গোটেই কাৰখানাটোত জুই বিয়পি পৰে। এই মৰ্মান্তিক দুৰ্ঘটনাত তিনিজন অভিযন্তাই প্ৰাণ হেৰুৱালে। আন এজন ব্যক্তিয়ে গুৰুতৰভাৱে আঘাতপ্ৰাপ্ত হৈ চিকিৎসালয়ত মৃত্যুৰ সৈতে যুঁজ দিছে। ঝাৰখণ্ডৰ ৰামগড় জিলাৰ এই ঘটনাত কাৰখানা কৰ্তৃপক্ষৰ চৰম গাফিলতিৰ অভিযোগ উত্থাপন কৰিছে শ্ৰমিকসকলে।
জানিব পৰা মতে, ৰামগড়ৰ হেহল অঞ্চলত অৱস্থিত ‘মা ছিন্নমস্তিকা চিমেণ্ট এণ্ড ইস্পাট’ৰ বিদ্যুৎ কেন্দ্ৰত সংঘটিত হৈছে এই দুৰ্ঘটনা। হঠাৎ মাজ নিশা উদ্যোগটোৰ টাৰ্বাইন বিকল হৈ পৰাত ভয়ংকৰ বিস্ফোৰণ ঘটে। ইয়াৰ পিছতে এক ভয়াৱহ অগ্নিকাণ্ডই সমগ্ৰ প্ৰকল্পটোক আগুৰি ধৰে।
ঘটনাৰ বাবেই নিশা কাৰখানাটোত চৰম আতংক আৰু হুলস্থুল বিয়পি পৰে। এই খবৰ পোৱাৰ লগে লগে আৰক্ষী আৰু অগ্নিনিৰ্বাপক বাহিনী সেই স্থানত উপস্থিত হয়।
ইতিমধ্যে শ্ৰমিকসকলে বিস্ফোৰণৰ কাৰণ সন্দৰ্ভত কাৰখানা কৰ্তৃপক্ষক আঙুলিয়াই দিছে। কাৰখানাৰ কৰ্মী অমিত কুমাৰে অভিযোগ কৰে যে কৰ্তৃপক্ষৰ চৰম গাফিলতিৰ বাবে তিনিটা সতেজ জীৱন অকালতে হেৰুৱাইছে। তেওঁ কয় যে বিদ্যুৎ কেন্দ্ৰৰ বৈদ্যুতিক পেনেল শীতল কৰি ৰাখিবলৈ এচি স্থাপন কৰা থাকে। কিন্তু টাৰ্বাইনটো বিকল হৈ যোৱাৰ ফলতে পেনেলত ভয়াৱহ বিস্ফোৰণ সংঘটিত হয়।
অমিতৰ চাঞ্চল্যকৰ দাবী, “যোৱা এমাহ ধৰি আমি বাৰে বাৰে এই সমস্যাৰ বিষয়ে কৰ্তৃপক্ষক অৱগত কৰি আহিছো। অভিযোগ কৰাৰ পিছতো কোনেও আমাৰ কথা শুনা নাছিল, বিপৰীতে বিষয়টো সম্পূৰ্ণৰূপে আওকাণ কৰা হৈছিল।”
জানিব পৰা মতে বিস্ফোৰণৰ তীব্ৰতা ইমানেই বেছি আছিল যে থিতাতে তিনিজন অভিযন্তাৰ মৃত্যু হয়। গুৰুতৰভাৱে আহত আন এজন ব্যক্তিক উদ্ধাৰ কৰি ৰাঁচীৰ এখন চিকিৎসালয়লৈ প্ৰেৰণ কৰা হয়। বৰ্তমান তেওঁ তাত চিকিৎসাধীন হৈ আছে।
টাৰ্বাইন বিস্ফোৰণৰ সঠিক কাৰণ কি আৰু কেনেকৈ সংঘটিত হ’ল সেয়া এতিয়াও কৰ্তৃপক্ষই স্পষ্টকৈ উল্লেখ কৰা নাই। অৱশ্যে দুৰ্ঘটনাৰ প্ৰকৃত কাৰণ জানিবলৈ ইতিমধ্যে প্ৰশাসনে তদন্ত আৰম্ভ কৰিছে।
