বঙাইগাঁও আৰক্ষীয়ে এক গোপন সূত্ৰৰ পমখেদি তিনিজন যুৱকক কৰায়ত্ত কৰে ৷ বঙাইগাঁও চহৰৰ নিউ বঙাইগাঁৱৰ পৰা আটক কৰা যুৱক তিনিজনৰ পৰা আৰক্ষীয়ে বিভিন্ন বেংকৰ এ টি এম কাৰ্ড, চিম কাৰ্ড, মোবাইল, নগদ ধন আৰু এখন মটৰ চাইকেল জব্দ কৰিছে ৷ আটকাধীন যুৱক তিনিজন পশ্চিম বংগৰ চাইবাৰ অপৰাধী চক্ৰৰ এটাক বেংকৰ এ টি এম কাৰ্ড, ছীম কাৰ্ড যোগান ধৰি আহিছিল বুলি আৰক্ষীয়ে জানিবলৈ দিছে ৷
এই সন্দৰ্ভত বঙাইগাঁও জিলাৰ অতিৰিক্ত আৰক্ষী অধীক্ষক লুণা সোনোৱালে সংবাদ মাধ্যমক জানিবলৈ দিয়া মতে আটকাধীন যুৱক তিনিজন বঙাইগাঁও জিলাৰ কোকিলা মাজপাৰাৰ আবুল কাশেমৰ পুত্ৰ আশ্ৰাফুল ইছলাম (২৭), বৰপেটা জিলাৰ কলগাছিয়াৰ উদমাৰীৰ ৰুস্তম আলীৰ পুত্ৰ বিল্লাল হুছেইন( ২১) আৰু কলগাছিয়াৰ খাৰবাল্লীৰ ৰেজাউল কৰিমৰ পুত্ৰ মনিৰুল ইছলাম (২০) ৷ আটকাধীন যুৱক তিনিজনৰ পৰা আৰক্ষীয়ে ২৫ খন বিভিন্ন বেংকৰ এটিএম কাৰ্ড, ১৮ খন ছীমকাৰ্ড, ৪ টা মোবাইল, এএছ-০১ই কে ১৮৮০ নম্বৰৰ এখন ইয়ামাহা মটৰ চাইকেল আৰু নগদ ৭,৯৩০ টকা জব্দ কৰে ৷ জব্দ কৰা এ টি এম কাৰ্ডসমূহ ফেডাৰেল বেংক, এক্সিচ বেংক, কোটাক, আই ডি এফ চি আদি বেংকৰ ৷ অতিৰিক্ত আৰক্ষী অধীক্ষকগৰাকীয়ে লগতে সংবাদ মাধ্যমক জানিবলৈ দিয়া মতে বঙাইগাঁও আৰু বৰপেটা জিলাৰ কোকিলা, কলগাছিয়া আদিকে ধৰি ভিতৰুৱা গাঁৱৰ পৰা এ টি এম আৰু মোবাইলৰ চিম কাৰ্ডধাৰীৰ পৰা নগদ ২০০০ টকাকৈ দি আটক কৰা লোকসকলে চিম কাৰ্ডৰ সৈতে এ টি এম কাৰ্ডসমূহ ক্ৰয় কৰিছিল।
এই এ টি এম কাৰ্ড আৰু ছীম কাৰ্ডসমূহ পিচত পশ্চিম বংগৰ এক চাইবাৰ অপৰাধী চক্ৰক ধনৰ বিনিময়ত যোগান ধৰে ৷ এই তিনি যুৱকে মঙলবাৰে বিয়লি পশ্চিমবংগৰ চাইবাৰ অপৰাধীক এ টি এম কাৰ্ড আৰু ছীম কাৰ্ডসমূহ গতাই দিবলৈ পশ্চিমবংগৰ বৰ্ধমানলৈ বুলি যোৱাৰ বাবে বঙাইগাঁৱত উপস্থিত হৈ নিউ বঙাইগাঁওলৈ গৈ থকা অৱস্থাত আৰক্ষীয়ে কৰায়ত্ত কৰে ৷ আটকাধীন যুৱক তিনিজনে আৰক্ষীৰ আগত প্ৰকাশ কৰা মতে এই কাৰ্ডসমূহ চাইবাৰ অপৰাধী চক্ৰটোৱে ব্যক্তিসকলক ব্যক্তিগত তথ্য যেনে পাছৱৰ্ড আৰু ক্ৰেডিট কাৰ্ড নম্বৰ প্ৰকাশ কৰিবলৈ প্ৰৰোচিত কৰিবলৈ সুনাম থকা কোম্পানীসমূহৰ পৰা অহা বুলি কোৱা ইমেইল প্ৰেৰণ কৰাৰ প্ৰৱঞ্চনামূলক আৰু ধন দাবী কাৰ্যত ব্যৱহাৰ কৰে ৷
আৰক্ষীৰ তদন্ত লগতে আটকাধীন যুৱক তিনিজনে পশ্চিম বংগৰ বৰ্ধমান নিবাসী ছবু আৰু নাৰু নামৰ দুজন ব্যক্তিৰ নাম প্ৰকাশ কৰিছে যি দুজনে চাইবাৰ অপৰাধ আৰু ধন দাবীৰ ক্ষেত্ৰত ব্যৱহাৰৰ বাবে কাৰ্ডসমূহ ক্ৰয় কৰে ৷ এই সন্দৰ্ভত বঙাইগাঁও আৰক্ষী থানাত এটা গোচৰ ৰুজু কৰি আৰক্ষীয়ে অধিক তথ্য উদঘাটনৰ বাবে ধৃত যুৱক তিনিজনক জেৰা অব্যাহত ৰাখিছে ৷