প্ৰধানমন্ত্ৰী নৰেন্দ্ৰ মোদীয়ে সোমবাৰে তেওঁৰ ৰাজ্যসভাৰ ভাষণত কৃষি আইনৰ সংশোধনৰ সমৰ্থনত প্ৰসংগক্ৰমে প্ৰাক্তন প্ৰধানমন্ত্ৰী ডঃ মনমোহন সিঙে পূৰ্বে আগবঢ়াই যোৱা এটা বক্তব্যক উল্লেখ কৰে।
“মই প্ৰাক্তন প্ৰধানমন্ত্ৰী মনমোহন সিঙৰ এটা বক্তব্য দোহাৰিব বিচাৰিছো, যদিও বিৰোধীয়ে হয়তো গুৰুত্ব নিদিবও পাৰে, কিন্তু মনমোহন সিঙে কৈ যোৱা কথাটো হয়তো গুৰুত্ব দিব।’ বুলি কৈ প্ৰধানমন্ত্ৰী নৰেন্দ্ৰ মোদীয়ে ৰাজ্যসভাত নিজৰ ভাষণ আৰম্ভ কৰে।
‘প্ৰচলিত বজাৰ ব্যৱস্থা ত্ৰিশৰ দশকতে গঠন হোৱা বাবে আন কিছু সমস্যাও আছে, যি আমাৰ কৃষকসকলক তেওঁলোকৰ উৎপাদনসমূহ উচিত মূল্যত বিক্ৰী কৰাত বাধা প্ৰদান কৰে। আমাৰ উদ্দেশ্য হৈছে সকলো প্ৰতিবন্ধকতাক দূৰ কৰা, যি সময়ত ভাৰতে এখন উমৈহতীয়া বজাৰৰ বিশাল সম্ভাৱনাক অনুধাৱন কৰিছে।’ মনমোহন সিঙে কৈছিল। কিন্তু এতিয়া কংগ্ৰেছে সম্পূৰ্ণ উলোটা খৰ মাৰিছে।” প্ৰধানমন্ত্ৰী মোদীয়ে ৰাজ্যসভাত বিৰোধীক কটাক্ষ কৰি কয়।
“কৃষকসকলে প্ৰতিবাদ কৰিবৰ বাবে তেওঁলোকৰ গণতান্ত্ৰিক অধিকাৰ আছে। কিন্তু মই এই সদনৰ পৰা পুনৰ কওঁ যে অদ্যপি কোনো পথ বন্ধ হোৱা নাই। কৃষিমন্ত্ৰী নৰেন্দ্ৰ সিং তমাৰে কৃষকসকলৰ স’তে আলোচনা অব্যাহত ৰাখিছে।” প্ৰধানমন্ত্ৰী মোদীয়ে লগতে কয়।
ন্যূনতম নিৰ্ধাৰিত সমৰ্থন মূল্য সম্পৰ্কে প্ৰধানমন্ত্ৰী মোদীয়ে কয়, “এই ব্যৱস্থাটো সদায় প্ৰচলিত থাকিব, যিদৰে আছে আৰু পূৰ্বেও চলি আহিছে। আমি এই বিষয়ে ভুল তথ্য বিয়পোৱা অনুচিত।”
“দেশখন আগুৱাই যোৱা উচিত, পাচলে নহয়,’’ কৃষি আইনসমূহৰ সংশোধনৰ সমৰ্থনত প্ৰধানমন্ত্ৰী মোদীয়ে পুনৰ এইদৰে কয়।
তেওঁ লগতে ৰাজ্যসভাৰ মজিয়াত কয় যে ক্ষুদ্ৰ কৃষকসকলৰ সমস্যাসমূহ প্ৰতিখন চৰকাৰে উত্থাপন কৰি আহিছে, বাস্তৱক্ষেত্ৰত সেয়া কাৰ্যকৰী হওক বা নহওক।
