উজনি অসমৰ ভয়াৱহ বান পৰিস্থিতিক লৈ ভাৰতৰ প্ৰধানমন্ত্ৰী নৰেন্দ্ৰ মোদীলৈ বিশেষ সাহায্য আৰু পুনৰসংস্থাপন পেকেজ ঘোষণাৰ দাবী জনাইছে যোৰহাটৰ সাংসদ তথা অসম প্ৰদেশ কংগ্ৰেছ কমিটীৰ সভাপতি গৌৰৱ গগৈয়ে।
অসম প্ৰদেশ কংগ্ৰেছ কমিটীয়ে প্ৰকাশ কৰা এক প্ৰেছ বিজ্ঞপ্তি অনুসৰি, লোকসভাৰ কংগ্ৰেছ সংসদীয় দলৰ উপ-দলপতি গৌৰৱ গগৈয়ে ৩০ জুলাইত প্ৰধানমন্ত্ৰীলৈ প্ৰেৰণ কৰা পত্ৰত উজনি অসমৰ বান পৰিস্থিতিৰ ভয়াৱহতাৰ প্ৰতি কেন্দ্ৰীয় চৰকাৰৰ জৰুৰী দৃষ্টি আকৰ্ষণ কৰে।
পত্ৰখনত বিশেষকৈ শিৱসাগৰ, চৰাইদেউ আৰু যোৰহাট জিলাত বানপানীয়ে সৃষ্টি কৰা ব্যাপক ক্ষয়-ক্ষতি, জনসাধাৰণৰ দুৰ্ভোগ, লগতে ৰাজহুৱা আন্তঃগাঁথনি, কৃষি, জীৱন আৰু জীৱিকাৰ ওপৰত পৰা গভীৰ প্ৰভাৱৰ বিষয়ে বিশদভাৱে উল্লেখ কৰা হৈছে।
সাংসদগৰাকীয়ে বানৰ ফলত হোৱা ক্ষয়-ক্ষতি পূৰণ, ক্ষতিগ্ৰস্ত লোকসকলৰ পুনৰসংস্থাপন আৰু বিধ্বস্ত আন্তঃগাঁথনি পুনৰ নিৰ্মাণৰ বাবে অসমলৈ এক বিশেষ বান সাহায্য আৰু পুনৰসংস্থাপন পেকেজ ঘোষণা কৰিবলৈ কেন্দ্ৰীয় চৰকাৰক আহ্বান জনায়।
প্ৰেছ বিজ্ঞপ্তিটোত কোৱা হৈছে যে, গৌৰৱ গগৈৰ এই পত্ৰৰ প্ৰতি প্ৰধানমন্ত্ৰীৰ কাৰ্যালয়ৰ ফালৰ পৰা ইতিমধ্যে এক প্ৰাপ্তিস্বীকাৰ পত্ৰ প্ৰেৰণ কৰা হৈছে।
এই সন্দৰ্ভত গৌৰৱ গগৈয়ে আশা প্ৰকাশ কৰে যে, বানপীড়িত অঞ্চলসমূহৰ দ্ৰুত পুনৰুদ্ধাৰ আৰু ক্ষতিগ্ৰস্ত পৰিয়ালসমূহৰ পুনৰসংস্থাপনৰ স্বাৰ্থত কেন্দ্ৰীয় চৰকাৰে অতি সোনকালে এক বিশেষ সাহায্য পেকেজ অনুমোদন কৰিব।
