দুশ বছৰতকৈও অধিক সময় ধৰি আমেৰিকাৰ সংস্কৃতিৰ অবিচ্ছেদ্য অংগ হৈ থকা ১ চেণ্ট মূল্যৰ মুদ্ৰা বা পেনিৰ উৎপাদন বন্ধ কৰি দিছে আমেৰিকাই। বুধবাৰে বন্ধ কৰি দিয়া হ’ল পেনি মুদ্ৰণ। মূল্যহীন এই মুদ্ৰাৰ আৰু উৎপাদন নহ’ব।
১৭৯৩ চনত যেতিয়া এই মুদ্ৰাটোৰ প্ৰচলন হৈছিল, তেতিয়া এটা পেনিৰে এখন বিস্কুট, এডাল মমবাতি বা চকলেট কিনিব পাৰিছিল। কিন্তু এতিয়া ইয়াৰ বেছিভাগেই কাঁচৰ জাৰ বা ড্ৰয়াৰত পৰি থাকে। ইয়াৰ উপৰিও প্ৰতিটো পেনি বনাবলৈ চৰকাৰৰ প্ৰায় ৪ চেণ্ট খৰচ হয়।
ফিলাডেলফিয়াৰ ইউ এছ মিণ্টত শেষৰটো পেনি মুদ্ৰণ হোৱাৰ আগতে ট্ৰেজাৰাৰ ব্ৰেণ্ডন বিচে কয়, “ভগৱানে আমেৰিকাক আশীৰ্বাদ কৰক, আমি কৰদাতাৰ ৫৬ মিলিয়ন ডলাৰ ৰাহি কৰিবলৈ ওলাইছো।” সাংবাদিকসকলে চাব পৰাকৈ ট্ৰে এখনত সযতনে মুদ্ৰাবোৰ ৰাখিছিল। খবৰ অনুসৰি শেষত মুদ্ৰিত কেইটামান পেনি নিলাম কৰা হ’ব।
যদিও বিলিয়ন বিলিয়ন পেনি এতিয়াও বজাৰত আছে আৰু আইনীভাৱে থাকিব, কিন্তু নতুনকৈ আৰু মুদ্ৰণ কৰা নহ’ব। বিষয়াসকলে জনোৱা মতে, গ্ৰীষ্মকালতে বেছিভাগ পেনিৰ মুদ্ৰণ বন্ধ কৰা হৈছিল। বিচে কয় যে শেষৰটো আমেৰিকাৰ মুদ্ৰা আছিল হাফ চেণ্ট, যিটো ১৮৫৭ চনত বাতিল কৰা হৈছিল।
শেষ মুদ্ৰাটো মুদ্ৰণ কৰাৰ সময়ত মিণ্টৰ শ্ৰমিকসকলে নিৰৱে থিয় হৈ আছিল, যেন তেওঁলোকে পুৰণি বন্ধু এজনকহে বিদায় দিছে। শেষৰ মুদ্ৰাবোৰ ওলোৱাৰ লগে লগে তেওঁলোকে হাত চাপৰি বজাই উল্লাস কৰে।
মূল্য বৃদ্ধি আৰু ১ চেণ্টৰ মূল্য কাৰ্যতঃ অপ্রাসংগিক হৈ পৰাৰ বাবেই ৰাষ্ট্ৰপতি ড’নাল্ড ট্ৰাম্পে পেনি বন্ধৰ নিৰ্দেশ দিছিল। ফেব্ৰুৱাৰী মাহত ট্ৰাম্পে অনলাইন পোষ্টত লিখিছিল যে বছৰ বছৰ ধৰি আমেৰিকাই তৈয়াৰ কৰা পেনিৰ বাবে ২ চেণ্টতকৈ অধিক খৰচ হয়। ই এক অপচয়।
তথাপিও বহু আমেৰিকান লোকে পেনিৰ বাবে নষ্টালজিক। বহুতে ইয়াক সৌভাগ্যৰ প্ৰতীক বা সংগ্ৰহযোগ্য বস্তু হিচাপে লয়। উৎপাদন আৰু যোগান বন্ধ হৈ অহাৰ লগে লগে একাংশ খুচুৰা বিক্ৰেতাই উদ্বেগ প্ৰকাশ কৰিছে। তেওঁলোকে কয় যে পৰ্যায়ক্ৰমে বন্ধ কৰাটোআকস্মিকআছিল আৰু লেনদেনৰ পথ প্ৰদৰ্শন কৰিবলৈ চৰকাৰী কোনো নিৰ্দেশনা নাছিল।
নেচনেল এছ’চিয়েশ্যন অৱ কনভিনিয়েন্স ষ্ট’ৰৰ জেফ লিঅ’নাৰ্ডে যোৱা মাহত কৈছিল, “আমি ৩০ বছৰ ধৰি এই পেনিটো নাইকিয়া কৰাৰ পক্ষত আছিলো। কিন্তু আমি বিচৰা নাছিলো যে ইয়াৰ অন্ত এনেকৈ হওক।”
মুদ্ৰাটো নিৰ্মূল কৰাৰ পক্ষত থকাসকলে খৰচৰ ৰাহি, কেছ ৰেজিষ্টাৰত দ্ৰুত লেনদেন আৰু অন্য দেশত ১ চেণ্টৰ মুদ্ৰা নিৰ্মূল হোৱাৰ কথা উল্লেখ কৰে। উদাহৰণস্বৰূপে কানাডাই ২০১২ চনত পেনি মুদ্ৰণ বন্ধ কৰি দিছিল।
উল্লেখ্য যে নিকেলৰ পেনিৰ উৎপাদন কৰিবলৈ ৫ চেণ্টৰ মুদ্ৰা এটাৰ বাবে খৰচ হয় প্ৰায় ১৪ চেণ্ট। ১০ চেণ্টৰ মুদ্ৰা এটা বনাবলৈ ৬ চেণ্টতকৈ কম আৰু কোৱাৰ্টাৰ (২৫ চেণ্ট) বনাবলৈ প্ৰায় ১৫ চেণ্ট খৰচ হয়।
অৱশ্যে সংগ্ৰাহক আৰু ইতিহাসবিদসকলে এই মুদ্ৰাসমূহক গুৰুত্বপূৰ্ণ ঐতিহাসিক তথ্য বুলি গণ্য কৰে। মুদ্ৰাৰ ইতিহাস অধ্যয়ন কৰা হিউষ্টন বিশ্ববিদ্যালয়ৰ এমেৰিটাছ অধ্যাপক ফ্ৰেংক হোল্টে এই মুদ্ৰা বন্ধ কৰাত দুখ প্ৰকাশ কৰে।
তেওঁ কয় যে আমি ইয়াৰ ওপৰত নীতি বাক্য আৰু আত্মপৰিচয় আঁকো, আৰু আমি সিদ্ধান্ত লওঁ যে আমেৰিকাৰ কোনজন মৃত লোক আমাৰ বাবে আটাইতকৈ গুৰুত্বপূৰ্ণ আৰু স্মৰণীয় হ’ব লাগে। এইবোৰ আমাৰ ৰাজনীতি, আমাৰ ধৰ্ম, আমাৰ শিল্প, আমাৰ নিজৰ ধাৰণা, আমাৰ আদৰ্শ আৰু আমাৰ আকাংক্ষাৰ প্ৰতিফলন।
