বিশ্ব হস্তী দিৱস উপলক্ষে ৰিলায়েন্স ইণ্ডাষ্ট্ৰিজৰ অনন্ত আম্বানীৰ দ্বাৰা প্ৰতিষ্ঠিত বন্যপ্ৰাণী সংৰক্ষণ প্ৰকল্প ‘বন্তৰা‘ই অসম চৰকাৰলৈ এক বিশেষ প্ৰস্তাৱ আগবঢ়াইছে। এই প্ৰস্তাৱ অনুসৰি, অসমত ৩টাকৈ অত্যাধুনিক ‘বন্যপ্ৰাণী উদ্ধাৰ আৰু পুনৰ্সংস্থাপন কেন্দ্ৰ’ স্থাপন কৰিবলৈ আগ্ৰহ প্ৰকাশ কৰিছে বন্তৰাই।
প্ৰাপ্ত তথ্য অনুসৰি, বন্তৰাৰ মুখ্য কাৰ্যবাহী বিষয়া বিভান কাৰানিয়ে ১২ আগষ্ট তাৰিখে অনন্ত আম্বানীৰ হৈ অসম চৰকাৰৰ পৰিৱেশ, বন আৰু জলবায়ু পৰিৱৰ্তন বিভাগৰ বিশেষ মুখ্য সচিবলৈ এই প্ৰস্তাৱপত্ৰখন আনুষ্ঠানিকভাবে প্ৰেৰণ কৰিছে।পত্ৰখনত উল্লেখ কৰা অনুসৰি, এই প্ৰস্তাৱিত ৩টা কেন্দ্ৰৰ ভিতৰত এটা কেন্দ্ৰ সম্পূৰ্ণৰূপে কেৱল এছিয়ান হাতীৰ কল্যাণৰ বাবে উচৰ্গা কৰা হ’ব। এই অত্যাধুনিক কেন্দ্ৰসমূহত জীৱ-জন্তুৰ প্ৰজাতি অনুসৰি বিশেষ আৱাস, উন্নত মানৰ পশু চিকিৎসালয়, ৰোগ নিৰ্ণয়ৰ পৰীক্ষাগাৰ (ডাইগনষ্টিক লেব) আৰু জীৱ-জন্তুৰ পুষ্টি কেন্দ্ৰৰ সুবিধা থাকিব।
এই সমগ্ৰ প্ৰকল্পটো অসম চৰকাৰৰ বন বিভাগৰ নিৰ্দেশনা আৰু তত্ত্বাৱধানত ৰূপায়ণ কৰাৰ প্ৰস্তাৱ দিয়া হৈছে। কেন্দ্ৰ তিনিটা ক’ত স্থাপন কৰা হ’ব আৰু কিমান পৰিসৰৰ হ’ব, সেই বিষয়ে ৰাজ্যৰ বন বিভাগৰ সৈতে আলোচনাৰ মাধ্যমেৰেহে সিদ্ধান্ত লোৱা হ’ব। আটাইতকৈ গুৰুত্বপূৰ্ণ কথাটো হ’ল, সম্পূৰ্ণ নিৰ্মাণ কাৰ্য শেষ হোৱাৰ পাছত ভাণ্টাৰাই এই কেন্দ্ৰসমূহ কোনো ধৰণৰ চৰ্ত বা মূল্য নোহোৱাকৈ অসম চৰকাৰক সম্পূৰ্ণ বিনামূলীয়াকৈ হস্তান্তৰ কৰিব বুলি পত্ৰ খনত উল্লেখ কৰিছে।
মন কৰিবলগীয়া কথা হ’ল, যি বন্তৰাই ‘বন্যপ্ৰাণী উদ্ধাৰ আৰু পুনৰ্সংস্থাপন কেন্দ্ৰ’ স্থাপনৰ এই প্ৰস্তাৱ দিছে, সেই প্ৰতিষ্ঠানটোৰ বিৰুদ্ধেই বন্যপ্ৰাণী সংৰক্ষণৰ নামত বিভিন্ন সময়ত অনিয়ম সংঘটিত কৰাৰ অভিযোগ উত্থাপিত হৈ আহিছে। অৱশ্যে, প্ৰতিষ্ঠানটোৰ বিৰুদ্ধে থকা এই অভিযোগসমূহ আদালতত প্ৰমাণিত হোৱা নাই। তথাপি এনে পৰিস্থিতিত বন্তৰাৰ এই সদিচ্ছাৰ আঁৰতো কোনো অভিসন্ধি নিহিত থাকিব পাৰে নেকি বুলি প্ৰকৃতিপ্ৰেমী তথা সচেতন মহলে সন্দেহ ব্যক্ত কৰিছে।
