মেঘালয়ৰ ৰাজ্যপাল সত্যপাল মালিকে কৰা এক বিশেষ মন্তব্যই এতিয়া সমগ্ৰ দেশতে তীব্ৰ প্ৰতিক্ৰিয়াৰ সৃষ্টি কৰা পৰিলক্ষিত হৈছে।
ৰাজ্যপাল মালিকে শেহতীয়াকৈ এই বুলি কৈছে যে আম্বানী আৰু আৰএছএছে ফাইল পাছ কৰাৰ বাবে তেওঁক ৩০০ কোটি টকাৰ উপঢৌকন যাঁচিছিল।
কাশ্মীৰৰ ৰাজ্যপাল হৈ থকাৰ সময়তে আম্বানী আৰু আৰএছএছৰ এজন বৰমূৰীয়াৰ দুটা ফাইলত অনুমোদন জনাবলৈ তেওঁক হেঁচা প্ৰদান কৰা হৈছিল।
ইয়াৰ বিনিময়ত ৰাজ্যপাল মালিকক তেওঁৰ সচিবৰ জৰিয়তে প্ৰতিটো ফাইলত ডেৰশ কোটিকৈ মুঠ তিনিশ কোটি টকা উৎকোচ হিচাবে দিব বিচৰা হৈছিল বুলি মালিকে মন্তব্য কৰে।
ৰাজস্থানৰ ঝুনঝুনুৰ এখন ৰাজহুৱা সভাত অংশগ্ৰহণ কৰি ৰাজ্যপাল সত্যপাল মালিকে এই বিস্ফোৰণ ঘটায়।
তেওঁ কয় যে আম্বানী আৰু আৰএছএছৰ পৰা পোৱা এনে টোপ তেওঁ পোনচাটেই প্ৰত্যাখান কৰিছিল আৰু সচিবক কৈছিল যে কাশ্মীৰলৈ তেওঁ পাঁচযোৰ কুৰ্তা-পায়জামা লৈ আহিছিল আৰু সেই খিনি লৈয়েই তেওঁ কাশ্মীৰৰ পৰা বিদায়ো ল’ব বিচাৰে।
ৰাজ্যপাল মালিকে লগতে কয় যে পাছ কৰিবলৈ উপঢৌকন যঁচা ফাইল দুটাৰ এটা ফাইল আছিল মেহবুবা মুফটিৰ এগৰাকী ঘনিষ্ঠ ব্যক্তিৰ। তেওঁ আম্বানীৰ মানুহ আছিল।
আনটো ফাইল আছিল আৰএছএছৰ এজন বৰমূৰীয়াৰ, যাৰ সৈতে প্ৰধানমন্ত্ৰীৰ ঘনিষ্ঠতা আছিল।
জনসভাতে ৰাজ্যপাল সত্যপাল মালিকে লগতে এই বুলিও উল্লেখ কৰে যে তেওঁ এজন দুখীয়া মানুহ।
সেয়াই তেওঁৰ শক্তি। সেই শক্তিৰেই তেওঁ ডাঙৰ ডাঙৰ মানুহৰ বিৰুদ্ধে যুঁজ চলাই যাব পাৰিব বুলি বিঞ্বাসী। কোনো অন্যায়কে জীৱনত কোনো দিনে প্ৰশ্ৰয় দিয়া নাই বুলিও মালিকে উল্লেখ কৰে।
উল্লেখ্য ৰাজ্যপাল মালিকৰ কাষলৈ অনুমোদনৰ বাবে অনা আম্বানীৰ ফাইলটো হয়তো কৰ্মচাৰী আৰু পেঞ্চনাৰৰ স্বাস্থ্য বীমা সমপৰ্কীয় ফাইল আছিল।
আম্বানীৰ ৰিলায়েন্সৰ এই আঁচনিৰ এখন চুক্তি ৰাজ্যপালে ২০১৮ চনত বাতিল কৰিছিল। অৱশ্যে মালিকে তেওঁৰ ওচৰলৈ অনুমোদনৰ বাবে অনা ফাইল দুটা দৰাচলতে কি ফাইল আছিল সেই বিষয়ে বিশেষ কোনো কথা উল্লেখ নকৰিলে।
উল্লেখ্য অন্যায়ক প্ৰশ্ৰয় নিদিওঁ বুলি কৈ অহা ৰাজ্যপাল সত্যপাল মালিকে চৰকাৰী পদবী কৰ্তন হোৱাৰ ভয় থকাৰ পিছতো দিল্লীত কৃষি আইনৰ বিৰোধিতা কৰি আন্দোলন কৰি অহা কৃষকৰ পক্ষত থিয় হম বুলি ৰাজহুৱাকৈ মন্তব্য কৰিছিল।
ফলত তেওঁ মোদী চৰকাৰৰ অপ্ৰিয় হৈ পৰিছিল।
