কেইবদশক জোৰা সশস্ত্ৰ বিদ্ৰোহৰ ভূমিত পৰিণত হোৱা নাগালেণ্ডত শেহতীয়াকৈ কেন্দ্ৰীয় চৰকাৰৰ সৈতে চলি থকা শান্তিচুক্তিকেন্দ্ৰিক শংকা-আশংকাক গভীৰ কৰি তুলিছে মুখ্য মন্ত্ৰীৰ কাৰ্য্যালয়ৰ এটা বেতাঁৰ বাৰ্তাই।
কেন্দ্ৰৰ দ্বাৰা শান্তি চুক্তিখনৰ চূডান্ত ৰূপায়ণৰ আগ জাননী হিচাপে অৰ্থোদ্ধাৰ কৰা এই বাৰ্তাটোত নাগালেণ্ডৰ মুখ্য মন্ত্ৰী নেইফিঅ’ ৰিঅ’ৰ কাৰ্য্যালয়ে আজি সকলো জিলা দণ্ডাধীশক তেওঁলোকৰ কাৰ্য্যালয় এৰি নাযাবলৈ নিৰ্দেশ দিছে।
জৰুৰী বাৰ্তাটো মুখ্য মন্ত্ৰীৰ কাৰ্য্যালয়ৰ উপ সচিব চি খাময়াং ইমলঙে প্ৰেৰণ কৰিছে আৰু সকলো উপায়ুক্ত, অতিৰিক্ত উপায়ুক্ত, মহকুমা বিষয়া আৰু অতিৰিক্ত সহয়াক আয়ুক্তসকলকো নিজৰ নিজৰ কাৰ্য্যালয়ৰ পৰা আঁতৰি নাথাকিবলৈ কোৱা হৈছে।
ইয়াৰোপৰি বাৰ্তাটোৰ জৰিয়তে জিলা দণ্ডাধীশসকলক তেওঁলোকৰ নিজৰ অধীনত থকা বিষয়া-কৰ্মচাৰীসকলক এই জাননীৰ কথা তাৎক্ষণিকভাৱে অৱগত কৰিবলৈ কোৱা হৈছে। লগতে ছুটীত থকা সকলোকে তৎকালীনভাৱে কামত যোগদান কৰিবলৈ নিৰ্দেশ দিবলৈ কোৱা হৈছে।
নতুনকৈ কোনো বিষয়াৰ ছুটী, যদিহে জৰুৰী চিকিৎসাজনিত কাৰণ নহয় আৰু নাগালেণ্ডৰ মুখ্য সচিবৰ দ্বাৰা সমৰ্থিত নহয়, অনুমোদন নকৰিবলৈ কোৱা হৈছে।
নাগা শান্তি চুক্তি সন্দৰ্ভত চৰকাৰৰ শীৰ্ষ পৰ্য্যায়ৰ বিষয়া আৰু মুখ্য মন্ত্ৰীৰ কাৰ্য্যালয়ে নীৰৱতা অৱলম্বন কৰাৰ সময়ত এই ৱায়াৰলেছ বাৰ্তাটোৱে সমগ্ৰ নাগা পক্ষবোৰৰ মাজত এটা চেপা উত্তেজনাৰ সৃষ্টি কৰিছে।
যোৱা ১৮ অক্টোবৰত কেন্দ্ৰ কোনো বিলম্ব নকৰাকৈ নাগা শান্তি চুক্তিক পূৰ্ণ দিবলৈ বদ্ধপৰিকৰ বুলি মন্তব্য কৰিছিল নাগালেণ্ডৰ ৰাজ্যপাল তথা কেন্দ্ৰ আৰু নাগা পক্ষবোৰৰ মাজৰ মধ্যস্থতাকাৰী আৰ এন ৰবিয়ে।
ইপিনে নাগা শান্তিচুক্তিৰ পৰা নাগা বিদ্ৰোহীসকলৰ মূল দাবী সুকীয়া সংবিধান আৰু সুকীয়া পতাকাৰ বাদ দিয়া হ’ব বুলি ওলাই থকা গুজৱেও পৰিস্থিতি ভিতৰি গম্ভীৰ কৰি ৰাখিছে।
এই দুয়োটা বা যিকোনো এটাৰ অবিহনে নাগা শান্তি চুক্তি অন্তঃসাৰশূন্য হ’ব আৰু নাগাসকলৰ দীঘলীয়া সংগ্ৰামক ই শূন্যত উপনীত কৰাবহি বুলি এন এছ চি এন (আই এম) গোটে ৰাজহুৱাকৈ মত প্ৰকাশ কৰি আহিছে।
আৰ এন ৰবিয়ে এন এছ চি এন (আই এম) ফ্ৰেইমৱৰ্ক এগ্ৰিমেণ্টলৈ নিজকে টানি আনিছে আৰু ইয়াত কাল্পনিক কথা যোগ দিছে বুলি মন্তব্য কৰিছিল। গোটটোৰ কিছু সংখ্যক নেতাৰ মন্তব্যক তেওঁ দুৰ্ভাগ্যজনক মনোভাবৰ প্ৰকাশ আখ্যা দিয়ে।
শেহতীয়াকৈ আৰ এন ৰবিয়ে নাগালেণ্ডৰ শান্তি-শৃংখলা পৰিস্থিতি পৰ্য্যালোচনা কৰি আছে।
