ত্ৰিপুৰাৰ মুখ্য মন্ত্ৰী বিপ্লৱ কুমাৰ দেৱে সোমবাৰে ত্ৰিপুৰাৰ পৰা ডুবাইলৈ ১৭ টন সুস্বাদু আৰু স্বাস্থ্যকৰ মাটিকঠাল ৰপ্তানিৰ ফ্লেগ অফ কৰে।
গ্ৰীষ্মকালীন ফলক বিশ্বজুৰি জনপ্ৰিয় কৰা পদক্ষেপৰ অংশস্বৰূপে ত্ৰিপুৰাই বিগত বৰ্ষত ১.৫ টন কুইন প্ৰজাতিৰ মাটিকঠাল ডুবাইলৈ ৰপ্তানি কৰিছিল।
মুখ্য মন্ত্ৰী দেৱে ২০২১ চনৰ ভিতৰত ত্ৰিপুৰাত মাটিকঠালৰ উৎপাদন ১.২৬ লাখ টনৰ পৰা ৩ লাখ টনলৈ বৃদ্ধি কৰাৰ কথা উল্লেখ কৰাৰ লগতে উৎপাদিত মাটিকঠালসমূহ ভাৰতত বিভিন্ন ৰাজ্য আৰু অন্য দেশসমূহলৈ ৰপ্তানি কৰা হ’ব বুলি কয়।
ৰপ্তানি কৰা মাটিকঠাল সমূহ ৯-১০ দিনৰ ভিতৰত ডুবাই পাব।
বাংলাদেশৰ সৈতে ত্ৰিপুৰাৰ প্ৰস্তাৱিত জলপথৰ কাম সম্পূৰ্ণ হ’লে মাটিকঠাল, নেমু আৰু অন্যন্য সামগ্ৰীৰ ৰপ্তানিৰ মূল্য আৰু হ্ৰাস পাব বুলি দেৱে মন্তব্য কৰে।
ত্ৰিপুৰাত কুইন প্ৰজাতিৰ মাটিকঠালৰ উৎপাদন ২৫ শতাংশ বৃদ্ধি পাইছে বুলি মত প্ৰকাশ কৰি দেৱে ৰাজ্যখনৰ প্ৰতিটো ব্লকতে কৃষকসকলক মাটিকঠালৰ খেতি বহলভাৱে কৰাৰ বাবে আহ্বান জনায়।
আনহাতে, মুখ্য মন্ত্ৰীগৰাকীয়ে ভবিষ্যতে ৰাজ্যখনে বিদেশলৈ আৰু অধিক মাটিকঠাল ৰপ্তানি কৰিবলৈ সক্ষম হ’লে কৃষকসকল লাভান্বিত হ’ব বুলিও গুৰুত্বপূৰ্ণ মন্তব্য কৰে।
তদুপৰি, দেৱে প্ৰধান মন্ত্ৰী নৰেন্দ্ৰ মোদীৰ ২০২২ চনৰ ভিতৰত কৃষকৰ আয় দুগুণ কৰাৰ লক্ষ্যত ত্ৰিপুৰা চৰকাৰে মাটিকঠাল ৰপ্তানিৰ দ্বাৰা উপনীত হ’ব বুলি কয়।
ত্ৰিপুৰাৰ কৃষি আৰু পৰিবহন মন্ত্ৰী প্ৰানজ্যিৎ সিং ৰয়ে কয় যে এটা মাটিকঠালৰ মূল্য সাধাৰণতে ৫-১০ টকা হয় কিন্তু ৰপ্তানিৰ ক্ষেত্ৰত প্ৰতিটো মাটিকঠালৰ মূল্য হয় গৈ ১৫ টকা।
ৰাজ্যখনৰ উদ্যান শস্য বিভাগে উল্লেখ কৰা অনুসৰি ইজৰাইল, বাহৰেইনকে আদি কৰি বিভিন্ন দেশে ত্ৰিপুৰাৰ পৰা মাটিকঠাল ক্ৰয় কৰাৰ প্ৰতি আগ্ৰহ ব্যক্ত কৰিছে।