মঙলবাৰে ইজৰাইলে লেবাননৰ ৰাজধানী বেইৰুটৰ দক্ষিণ ডাহিয়া অঞ্চলৰ এটা অট্টালিকাত ড্ৰ’ন আক্ৰমণ চলায়। ড্ৰ’নৰ পৰা দ্ৰুতগতিত একেৰাহে তিনিটা ক্ষেপণাস্ত্ৰ নিক্ষেপ কৰা হয়। এই আক্ৰমণত পেলেষ্টাইনৰ স্বাধীনতাকামী গোষ্ঠী হামাছৰ ৰাজনৈতিক শাখাৰ উপ-মূৰব্বী ছালেহ আল-আৰুৰী আৰু কাছাম ব্ৰিগেডৰ দুজন অধিনায়ককে ধৰি কমেও সাতজন লোক নিহত হয়।
ইজৰাইলৰ এই আক্ৰমণত ওচৰৰ কিছুমান অট্টালিকাও ক্ষতিগ্ৰস্ত হয়। আন কেইবাজনো লোক আহত হয়।
ছালেহ আল-আৰুৰীৰ মৃত্যুৰ ঘটনা হামাছে আনুষ্ঠানিকভাৱে নিশ্চিত কৰিছে। সংগঠনটোৰ প্ৰভাৱশালী সদস্য ইজ্জাত ৰিচকে কয় যে এই হত্যাকাণ্ডৰ জৰিয়তে ইজৰাইলৰ পৰাজয় পুনৰ স্পষ্ট হৈ পৰিছে। আৰুৰীক কাপুৰুষোচিতভাৱে হত্যা কৰা হ’ল।
লগতে পঢ়কঃ কেন্দ্ৰৰ আশ্বাসত প্ৰতিবাদ সামৰিলে ট্ৰাক চালকসকলে; আজি উভতিব কামলৈ
তেওঁ মন্তব্য কৰে যে পেলেষ্টাইন আৰু পেলেষ্টাইনৰ বাহিৰত এনে হত্যাকাণ্ড সংঘটিত কৰি পেলেষ্টাইনীসকলক তেওঁলোকৰ লক্ষ্যৰ পৰা আঁতৰাই নিব নোৱাৰি।
ছালেহ আল-আৰুৰী (৫৭) গাজাস্থিত পেলেষ্টাইনী প্ৰতিৰোধ গোট হামাছৰ পলিটব্যুৰোৰ উপ-মূৰব্বী আছিল। তেওঁ সশস্ত্ৰ সংগঠনটোৰ সামৰিক শাখা আল-কাছেম ব্ৰিগেডছৰ অন্যতম প্ৰতিষ্ঠাপক আছিল।
১৯৬৬ চনত পেলেষ্টাইনৰ ৰামাল্লাৰ ওচৰৰ আৰুৰা গাঁৱত ছালেহ আল আৰুৰীৰ জন্ম হৈছিল। তেওঁ ইছলামিক শ্বৰীয়ত বিশ্ববিদ্যালয়ৰ ডিগ্ৰী লাভ কৰিছিল। ১৯৮৭ চনত হামাছত যোগদান কৰে।
লগতে পঢ়কঃ পৰিয়ালৰ বাধা নামানি গৈছিল ফুৰিবলৈঃ নৱবৰ্ষৰ প্ৰথম দিনাই দুৰ্ঘটনাত প্ৰাণ হেৰুৱালে ৬ যুৱকে
ইহুদীবাদী ইজৰাইলত ১৫ বছৰ কাৰাগাৰত কটাবলগীয়া হোৱা মুক্তিপ্ৰাপ্ত বন্দী আছিল আৰুৰী। মুক্তিৰ পিছৰে পৰা তেওঁ লেবাননত নিৰ্বাসিত হৈ আছিল।
২০১১ চনত ইজৰাইলী বাহিনীৰ গিলাট শালিটৰ মুক্তিৰ বিনিময়ত বহু পেলেষ্টাইনী বন্দীক মুকলি কৰি দিয়াত আৰুৰীয়ে গুৰুত্বপূৰ্ণ ভূমিকা পালন কৰিছিল।
লগতে পঢ়কঃজাপানৰ বিমান দুৰ্ঘটনাঃ পাঁচজনৰ মৃত্যু নিশ্চিত কৰিলে কৰ্তৃপক্ষই
বিগত বৰ্ষৰ ৭ অক্টোবৰত যুদ্ধ আৰম্ভ হোৱাৰ পূৰ্বে ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে তেওঁক হত্যা কৰাৰ ভাবুকি দিছিল। শেহতীয়াকৈ আৰুৰীয়ে হামাছৰ এজন অন্যতম মুখপাত্ৰৰ ভূমিকা পালন কৰি আহিছিল।
