হাতীৰ মাংসৰে ভোজ খোৱাটো উত্তৰ-পূৰ্বাঞ্চলত এটা নতুন ধাৰা হৈ পৰিছে।
মিজোৰামৰ পাছত এইবাৰ নাগালেণ্ডত হাতীৰ মাংসৰে ভোজ খোৱা দেখা পোৱা গৈছে।
নাগালেণ্ডৰ ঝুনেবুটো জিলাত ভক্ষণ কৰাৰ বাবে এটা হাতীৰ ছাল ছেলাই থকা ফটো ছচিয়েল মিডিয়াত ভাইৰেল হৈ পৰিছে।
বাতৰি অনুসৰি, মধ্য নাগালেণ্ডৰ ঝুনেবুটো জিলাৰ লিটামি গাঁৱৰ সমীপৰ এখন জংঘলত এটা হাতী গুলীয়াই হত্যা কৰা হৈছিল। বুধবাৰে এই ঘটনাটো সংঘটিত হৈছিল।
লগতে পঢ়ক অসমৰ ৪৭ বছৰীয়া মাইকী হাতীৰ মাংসৰে মিজোৰামত বৰভোজ
বাতৰি অনুসৰি, হাতীটোৰ ছাল ছেলাই পেলোৱা হয় আৰু ইয়াৰ মাংস খাবৰ বাবে গাঁৱবাসীৰ মাজত সমানে বিতৰণ কৰা হয়।
আশ্চৰ্যজনকভাৱে, হাতীটোৰ হত্যা সন্দৰ্ভত নাগালেণ্ডৰ বন বিভাগৰ পৰা কোনো আনুষ্ঠানিক বিবৃতি প্ৰকাশ পোৱা নাছিল।
হাতীটো বনৰীয়া আছিল নে পোহনীয়া আছিল আৰু হাতীটোৰ হত্যাৰ বাবে প্ৰকৃততে কোন জগৰীয়া সেয়া নিশ্চিত হ’ব পৰা নাই।
বাংগালোৰৰ প্ৰসিদ্ধ বন্যপ্ৰাণী অধিকাৰ কৰ্মী সুপৰ্ণা গাংগুলীয়ে দেওবাৰে মিজোৰামত হাতীৰ মাংসৰে ভোজ খোৱা বিষয়টো সন্দৰ্ভত পৰিৱেশ আৰু বন মন্ত্ৰালয়ৰ প্ৰজেক্ট এলিফেন্ট ডিভিজনলৈ পত্ৰ লিখিছিল।
লক্ষ্মী নামৰ এটা ৪৭ বছৰীয়া পোহনীয়া হাতীৰ ত্ৰিপুৰাৰ জামপুই পাহাৰৰ সীমান্তৰ পশ্চিম মিজোৰামৰ মামিট জিলাৰ কানমুন ফৰেষ্ট ৰেঞ্জৰ সমীপত কেইদিনমান পূৰ্বে মৃত্যু হৈছিল।
লগতে পঢ়ক বিয়াগোম হাতীৰ মাংসৰ শতাধিক ভাগ
এক অতি আচহুৱা কাণ্ডত, মৃত হাতীটো কাটি ইয়াৰ মাংস ভাগ ভাগ কৰি বিতৰণ কৰে আৰু গাঁৱবাসীয়ে মুকলিভাৱে ইয়াক ভক্ষণ কৰে।
ৱাইল্ড লাইফ ৰেচকিউ এণ্ড ৰিহেবিলিশ্যন চেন্টাৰৰ সহ-প্ৰতিষ্ঠাপক ট্ৰাষ্টী গাংগুলীয়ে প্ৰজেক্ট এলিফেন্ট ডিভিজনৰ মুৰব্বী নয়েল থমাছক ঘটনা সন্দৰ্ভত তাৎক্ষণিক কাৰ্যব্যৱস্থা গ্ৰহণ কৰিবলৈ অনুৰোধ জনাইছিল।
জানিব পৰা মতে দক্ষিণ অসমৰ কাছাৰ জিলাৰ সোনাইৰ হাতীটোৰ গৰাকীয়ে কানমুন ফৰেষ্ট ৰেঞ্জৰ সমীপৰ এগৰাকী কাঠৰ ব্যৱসায়ীক গধূৰ কাঠৰ কুণ্ডা কঢ়িয়াবলৈ হাতীটো ভাড়াত দিছিল।
তাৎপৰ্যপূৰ্ণভাৱে, অসমৰ বন বিভাগৰ জ্যেষ্ঠ বিষয়াই লক্ষ্মী নামৰ হাতীটো মিজোৰামলৈ নিয়াৰ বাবে কোনো অনুমতি প্ৰদান কৰা নাছিল।
উচ্চতম ন্যায়ালয়ৰ নিৰ্দেশ অনুসৰি, দুয়োখন ৰাজ্যৰ বন্যপ্ৰাণী বিভাগৰ মুৰব্বীৰ অনুমোদন অবিহনে এখন ৰাজ্যৰ পৰা আন এখন ৰাজ্যলৈ হাতী পৰিবহণ কৰিব নোৱাৰে।
