তেলেগু দেশমৰ মুৰব্বী চন্দ্ৰবাবু নাইডুৰ পিছত এইবাৰ দিল্লীত অন্ধ্ৰ প্ৰদেশৰ মুখ্যমন্ত্ৰী তথা ৱাই এছ আৰ কংগ্ৰেছৰ সভাপতি জগনমোহন ৰেড্ডী। শুকুৰবাৰে পুৱা জগনে প্ৰধানমন্ত্ৰী নৰেন্দ্ৰ মোদীৰ কাৰ্যালয়লৈ গৈ তেওঁৰ সৈতে বৈঠকত মিলিত হয়। অন্ধ্ৰ মুখ্যমন্ত্রীয়ে কয় যে তেওঁ নিজৰ ৰাজ্যৰ বাবে ‘বিশেষ মৰ্যাদা’ বিচাৰি প্রধানমন্ত্রীৰ ওচৰলৈ আহিছিল৷
কিন্তু লোকসভা নিৰ্বাচনৰ পূৰ্বে জগনৰ দিল্লী ভ্ৰমণে ‘ৰাজনৈতিক মাত্ৰা’ লাভ কৰিছে। উল্লেখ্য যে শুকুৰবাৰেই মোদীয়ে অন্ধ্ৰৰ নেতা প্ৰয়াত প্ৰাক্তন প্ৰধানমন্ত্ৰী পি ভি নৰসিংহ ৰাওলৈ মৰণোত্তৰ ভাৰতৰত্ন বঁটা ঘোষণা কৰে।
ইপিনে, অন্ধ্ৰৰ ৰাজনীতিত জগনৰ মূল প্ৰতিদ্বন্দ্বী তেলেগু দেশম পাৰ্টিৰ মুৰব্বী চন্দ্ৰবাবু নাইডুৱে বুধবাৰে নিশা দিল্লী ভ্ৰমণ কৰি কেন্দ্ৰীয় গৃহমন্ত্ৰী অমিত শ্বাহক সাক্ষাৎ কৰে। অন্ধ্রৰ প্রাক্তন মুখ্যমন্ত্রী চন্দ্রবাবুৱে ছবছৰৰ পাছত বিজেপি নেতৃত্বাধীন এন ডি এলৈ ঘূৰি আহিব বুলি জল্পনা-কল্পনাৰ সৃষ্টি হৈছে৷
লগতে পঢ়কঃ প্ৰাণ নাশৰ আতংক! বিমানৰ জৰুৰীকালীন দ্বাৰ খোলাৰ চেষ্টা যাত্ৰীৰঃ গোচৰ ৰুজু
ইতিমধ্যে তাত শাসকীয় ৱাইএছআৰ কংগ্ৰেছক পৰাস্ত কৰিবলৈ টিডিপিয়ে তেলেগু অভিনেতা-ৰাজনীতিবিদ পৱন কল্যাণৰ জনসেনা পাৰ্টিৰ সৈতে হাত মিলাইছে। একাংশ জনমত সমীক্ষাত ইতিমধ্যে দাবী কৰা হৈছে যে বিজেপিয়েও মিত্ৰতাত যোগদান কৰিলে জগনৰ ক্ষতিৰ সম্ভাৱনা আছে।
আনহাতে, লোকসভা নিৰ্বাচনৰ সমান্তৰালকৈ এপ্ৰিল-মে’ মাহত অন্ধ্ৰ বিধানসভা নিৰ্বাচন অনুষ্ঠিত হোৱাৰ সম্ভাৱনা আছে। উল্লেখ্য যে জগনমোহনৰ ভগ্নী শৰ্মিলাই ইতিমধ্যে কংগ্ৰেছত যোগদান কৰি ৰাজ্যিক সাংগঠনিক মুৰব্বীৰ দায়িত্ব লাভ কৰিছে। ৰাজনৈতিক বিশ্লেষকৰ এটা অংশৰ মতে কংগ্ৰেছে ক্ষমতা দখল কৰাত ব্যৰ্থ হ’লেও প্ৰয়াত মুখ্যমন্ত্ৰী ৱাই এছ ৰাজশেখৰ ৰেড্ডীৰ কন্যাক প্ৰক্ষেপ কৰি এইবাৰ জগনৰ দলৰ ভোটবেংকত বিভাজন আনিব পাৰে। সেই ক্ষেত্ৰত লাভৱান হ’ব চন্দ্ৰবাবু নাইডু।
লগতে পঢ়কঃ তুংগত সংঘাত! ছচিয়েল মিডিয়াত ইজনে সিজনক আনফ’ল’ কৰিলে হাৰ্দিক-ৰোহিতে?
সেই শংকাৰ পৰা হাত সাৰিবলৈকে অন্ধ্রৰ মুখ্যমন্ত্রী হঠাৎ মোডীৰ ‘দৰবাৰ’ত উপস্থিত হ’ল নেকি তাক লৈ চৰ্চা আৰম্ভ হৈছে৷ কিন্তু যোৱা ডেৰ দশকত অন্ধ্ৰত লোকসভা-বিধানসভাৰ প্ৰতিটো নিৰ্বাচনৰ পূৰ্বে ‘বিশেষ ৰাজ্যৰ মৰ্যাদা’ৰ বিষয়টো ৰাজনৈতিকভাৱে তুলি ধৰাৰ দৃষ্টান্ত দেখা গৈছে।
উল্লেখ্য ২০০৯ চনত হেলিকপ্টাৰ দুৰ্ঘটনাত অবিভক্ত অন্ধ্ৰৰ তদানীন্তন মুখ্যমন্ত্ৰী তথা কংগ্ৰেছ নেতা ৰাজশেখৰ ৰেড্ডীৰ মৃত্যু হৈছিল। তেওঁৰ মৃত্যুৰ লগে লগে খালী হোৱা কৰপ্পা জিলাৰ পুলিভেণ্ডুলা বিধানসভা সমষ্টিৰ উপ-নিৰ্বাচনত তেওঁৰ পত্নী বিজয়ম্মাই জয়লাভ কৰে।
লগতে পঢ়কঃ মহান নিদৰ্শনঃ কৰ্কট ৰোগত মৃত্যু হোৱা কবিতা ভূঞা খাউণ্ডৰ মৰণোত্তৰ দেহদান
কংগ্ৰেছৰ শীৰ্ষ নেতৃত্বৰ সৈতে মতানৈক্যৰ বাবে ৰাজশেখৰ-পুত্ৰ জগনে ২০১১ চনত নতুন দল ৱাই এছ আৰ কংগ্ৰেছ গঠন কৰিছিল। সেই সময়ত মাক বিজয়ম্মা আৰু ভগ্নী শৰ্মিলাক তেওঁৰ কাষতে পোৱা গৈছিল। পিছত দুয়োৰে মাজৰ দূৰত্ব বাঢ়ি আহিল।
