নতুন দিল্লীত আয়োজন কৰা হৈছিল তৃতীয় ভইচ অৱ দ্য গ্ল’বেল চাউথ ছামিট। বাংলাদেশৰ অন্তৱৰ্তীকালীন চৰকাৰৰ মুখ্য উপদেষ্টা মহম্মদ ইউনুছে ভাৰ্চুৱেলি এই আন্তঃৰাষ্ট্ৰীয় সন্মিলনত যোগদান কৰে। শুকুৰবাৰেই ভাৰতৰ প্ৰধানমন্ত্ৰী নৰেন্দ্ৰ মোদীয়ে ইউনুছৰ সৈতে ফোনত বাৰ্তালাপ কৰে। তেতিয়াই মোদীয়ে তেওঁক এই সন্মিলনত অংশগ্ৰহণ কৰিবলৈ আমন্ত্ৰণ জনাইছিল।
শুকৰবাৰে মোডী আৰু ইউনুছে বাংলাদেশৰ হিন্দু সংখ্যালঘুৰ নিৰাপত্তাৰ কথা পাতে। মুখ্য উপদেষ্টাগৰাকীয়ে দেশৰ সকলোৰে সুৰক্ষা নিশ্চিত কৰাৰ আশ্বাস দিয়ে। ফোনত বাৰ্তালাপত মোদীয়ে ইউনুছক বাংলাদেশৰ অন্তৱৰ্তীকালীন চৰকাৰৰ মুৰব্বী হিচাপে দায়িত্ব লোৱাৰ বাবে অভিনন্দন জনায়।
ইয়াৰ পিছতে মোডীয়ে তেওঁক এই সন্মিলনলৈ আমন্ত্ৰণ কৰে। সেই আমন্ত্ৰণৰ প্ৰতি সঁহাৰি জনাই শনিবাৰে মুখ্য উপদেষ্টা ইউনুছে ঢাকাৰ পৰা অনলাইনযোগে শীৰ্ষ সন্মিলনত যোগদান কৰে। অন্তৱৰ্তীকালীন চৰকাৰৰ দায়িত্ব লোৱাৰ পিছত এই প্ৰথমবাৰৰ বাবে তেওঁ আন্তঃৰাষ্ট্ৰীয় সন্মিলনত অংশগ্ৰহণ কৰে।
যোৱা ৫ আগষ্টত গণ প্ৰতিবাদৰ বাবে বাংলাদেশৰ প্ৰাক্তন প্ৰধানমন্ত্ৰী শ্বেখ হাছিনাই পদত্যাগ কৰিবলৈ বাধ্য হৈছিল। দেশ এৰি তেওঁ আপাততঃ ভাৰতত আশ্ৰয় লৈছে। হাছিনাৰ চৰকাৰৰ পতনৰ পিছৰে পৰা দেশত হিন্দু আৰু অন্যান্য সংখ্যালঘু লোকৰ ওপৰত আক্ৰমণ চলি আহিছে। বিশেষকৈ হিন্দুৰ ঘৰ-দুৱাৰ আৰু সম্পত্তিৰ ওপৰত আক্ৰমণ কৰা হৈছে। হিন্দু মন্দিৰ ধ্বংস কৰাৰো অভিযোগ উত্থাপন হৈছে।
নতুন দিল্লীয়ে এই সন্দৰ্ভত উদ্বেগ প্ৰকাশ কৰিছে। কিন্তু ইউনুছে এই সন্দৰ্ভত মোডীক আশ্বাস দিছে। ভৱিষ্যতেও দুয়োখন দেশৰ মাজৰ বন্ধন সুদৃঢ় কৰি ৰখাৰ বাবেও তেওঁ আগ্ৰহী।
ইফালে ডাচ প্ৰধানমন্ত্ৰী ডিক শ্বুফে বাংলাদেশৰ অন্তৱৰ্তীকালীন চৰকাৰক শুভেচ্ছা জনায়। বাংলাদেশত নিৰ্বাচনৰ আহ্বান জনাই এখন পত্ৰত তেওঁ লিখিছে, ‘সকলো ক্ষেত্ৰতে সফলতা কামনা কৰিলোঁ। গণতান্ত্ৰিক নিৰ্বাচনৰ বাবে বাংলাদেশ সাজু হোৱা উচিত। দুয়োখন দেশৰ মাজত দীৰ্ঘস্থায়ী দ্বিপাক্ষিক সম্পৰ্কৰ বাবে মই আশাবাদী।‘
লগতে পঢ়কঃ ‘চুটি কাপোৰত এনেয়ে বহুৱাই ৰাখিছিল বিবেক অগ্নিহোত্ৰীয়ে’; গুৰুতৰ অভিযোগ অভিনেত্ৰী তনুশ্ৰীৰ
আনহাতে, দক্ষিণ কোৰিয়াই ইউনুছৰ নেতৃত্বত ২১ জনীয়া অন্তৱৰ্তীকালীন চৰকাৰৰ সৈতে কাম কৰিব বিচাৰিছে। শুকুৰবাৰে সেই দেশৰ বৈদেশিক পৰিক্ৰমা মন্ত্ৰালয়ৰ মুখপাত্ৰই কয় যে, “দক্ষিণ কোৰিয়া আশাবাদী যে অন্তৱৰ্তীকালীন চৰকাৰে বাংলাদেশত শান্তি-শৃংখলা ক্ষিপ্ৰতাৰে ঘূৰাই আনিব। দক্ষিণ কোৰিয়াই বাংলাদেশৰ সৈতে সম্পৰ্ক আগুৱাই নিয়াৰ বাবে অন্তৱৰ্তীকালীন চৰকাৰৰ সৈতে কাম কৰিবলৈ আগ্ৰহী।”
