শাসক-বিৰোধী দলৰ বিধায়কসকল হতাহতিত লিপ্ত হয়। বৃহস্পতিবাৰে পুৱা ৩৭০ অনুচ্ছেদক লৈ একেবাৰে উত্তপ্ত হৈ পৰে জম্মু-কাশ্মীৰ বিধানসভা। নিৰাপত্তাৰক্ষীয়ে ততাতৈয়াকৈ বহু কষ্ট কৰি দুয়োটা পক্ষক শান্ত কৰে।
বৃহস্পতিবাৰে এখন পোষ্টাৰক কেন্দ্ৰ কৰি এই ঘটনা আৰম্ভ হয়। পুৱা বিধানসভাৰ অধিৱেশন আৰম্ভ হোৱাৰ লগে লগে বাৰামুল্লাৰ সাংসদ অভিযন্তা ৰছিদৰ ভাতৃ তথা আৱামী ইত্তেহাদ পাৰ্টিৰ বিধায়ক খুৰশ্বিদ আহমেদ শ্বেখে ৩৭০ অনুচ্ছেদ বিলুপ্তিৰ প্ৰতিবাদত এখন পোষ্টাৰ লগাই দিয়ে। সেই পোষ্টাৰক লৈ আপত্তি কৰে বিজেপিৰ বিধায়ক সুনীল শৰ্মাই। ইয়াৰ পিছতে বিজেপিৰ বিধায়কসকলে শ্লোগান দিবলৈ আৰম্ভ কৰে। প্ৰথমে শাসক আৰু বিৰোধী বিধায়কৰ মাজত ঠেলাঠেলি, তাৰ পিছত একেবাৰে হতাহতি ঘটে।
সংঘাত ৰখাবলৈ নিৰাপত্তাৰক্ষীয়ে বিধানসভা চৌহদত প্ৰৱেশ কৰিবলৈ বাধ্য হয়। এই ঘটনাৰ পিছতে অধ্যক্ষ আব্দুল ৰহিম ৰাথোৰে সদন স্থগিত ৰাখে।
উল্লেখ্য উক্ত বেনাৰত দুটা দাবী লিখা হৈছিল। ৩৭০ অনুচ্ছেদ পুনৰ কাৰ্যকৰী কৰি ৰাজনৈতিক বন্দীসকলক মুকলি কৰি দিব লাগে। লগে লগে খুৰশ্বিদ আহমেদ শ্বেখৰ সেই বেনাৰ প্ৰদৰ্শন কৰাত বিজেপিয়ে আপত্তি কৰে। কাশ্মীৰ বিধানসভাৰ বিৰোধী দলৰ নেতা সুনীল শৰ্মাই এই বেনাৰক লৈ তীব্ৰ আপত্তি কৰে। কিন্তু খুৰশ্বিদ আহমেদে বেনাৰ আঁতৰাবলৈ অস্বীকাৰ কৰে।
ইয়াৰ পিছত দুয়োটা শিবিৰৰ মাজত সংঘাত আৰম্ভ হয়। সদনৰ মজিয়ালৈ নামি আহিল বিজেপিৰ বিধায়কসকল। নামি আহে নিৰ্দলীয় আৰু আৱামী ইত্তেহাদ পাৰ্টিৰ বিধায়কসকলো। অৱশেষত নিৰাপত্তাৰক্ষীক মাতিব অনা হয়। সদন স্থগিত ৰাখিব লগা হয়।
লগতে পঢ়কঃজন্মসূত্ৰে আৰু নাপাব আমেৰিকাৰ নাগৰিকত্ব! ট্ৰাম্পৰ নতুন নীতিয়ে সমস্যাত পেলাব ভাৰতীয়সকলক
উল্লেখ্য যে বুধবাৰে কাশ্মীৰ বিধানসভাই বিশেষ মৰ্যাদা ঘূৰাই দিয়াৰ দাবীত প্ৰস্তাৱ গৃহীত কৰে। কেন্দ্ৰৰ সৈতে আলোচনা বিচৰা হৈছে। বিজেপিৰ তীব্ৰ বিৰোধিতা সত্ত্বেও কাশ্মীৰ বিধানসভাই এই প্ৰস্তাৱ গৃহীত কৰে। তাৰ পিছত বৃহস্পতিবাৰে এই ঘটনা সংঘটিত হয়।
