এইবাৰ উত্তৰ প্ৰদেশৰ মুখ্যমন্ত্ৰী যোগী আদিত্যনাথক মৃত্যুৰ ভাবুকি দিয়া হৈছে। শনিবাৰে নিশা মুম্বাই আৰক্ষীয়ে লাভ কৰে এক ভাবুকি বাৰ্তা। য’ত কোৱা হৈছে, মহাৰাষ্ট্ৰৰ প্ৰাক্তন মন্ত্ৰী বাবা ছিদ্দিকীৰ দৰে যোগী আদিত্যনাথকো উৰুৱাই দিয়া হ’ব। তেওঁক ১০ দিনৰ ভিতৰত পদত্যাগ কৰিবলৈ সকীয়াই দিয়া হৈছে।
জানিব পৰা মতে, শনিবাৰে নিশা মুম্বাই আৰক্ষীৰ যান-বাহন নিয়ন্ত্ৰণ কোষে এই ভাবুকি বাৰ্তা লাভ কৰে। অজ্ঞাত নম্বৰৰ পৰা প্ৰেৰণ কৰা হৈছে মেছেজটো। ইতিমধ্যে মুম্বাই আৰক্ষীয়ে তদন্ত আৰম্ভ কৰিছে। এই খবৰ বিয়পি পৰাৰ লগে লগে উত্তৰ প্ৰদেশৰ মুখ্যমন্ত্ৰীৰ নিৰাপত্তা কটকটীয়া কৰি তোলা হৈছে।
কিন্তু এয়াই প্ৰথমবাৰৰ বাবে নহয়। ইয়াৰ পূৰ্বেও যোগী আদিত্যনাথক কেইবাবাৰো মৃত্যুৰ ভাবুকি দিয়া হৈছিল। যোৱা বছৰ স্বাধীনতা দিৱসৰ পূৰ্বে উত্তৰ প্ৰদেশৰ মুখ্যমন্ত্ৰীক উৰুৱাই দিয়াৰ ভাবুকি দিয়া এখন পত্ৰক লৈ লক্ষ্ণৌত চাঞ্চল্যৰ সৃষ্টি হৈছিল। উত্তৰ প্ৰদেশৰ জনস্বাৰ্থৰ গোচৰকাৰী দেৱেন্দ্ৰ তিৱাৰীৰ ঘৰৰ পৰা উদ্ধাৰ হৈছিল চিঠিখন।
লগতে পঢ়কঃ ৰে’ল লাইন চাফা কৰি থকা অৱস্থাত চলন্ত ৰে’লৰ খুন্দাত নিহত ৪ জন ৰে’লৱেৰ চাফাই কৰ্মী
ভাবুকিটোত কোৱা হৈছিল, ‘অন্ততঃ নিৰাপত্তাৰক্ষী আছে, নহ’লে বহু আগতেই যোগী আদিত্যনাথক উৰুৱাই দিলোঁহেঁতেন৷ নিজকে সংশোধন কৰক। নহ’লে প্ৰাণ হেৰুৱাব।’ তাৰো পূৰ্বে উত্তৰ প্ৰদেশ আৰক্ষীৰ হেল্পলাইন হোৱাটছএপ নম্বৰত ফোন কৰি মুখ্যমন্ত্ৰীৰ প্ৰাণনাশৰ ভাবুকি দিয়া হৈছিল। নৰেন্দ্ৰ মোডী আৰু যোগী আদিত্যনাথক হত্যাৰ ভাবুকিও লাভ কৰিছে মুম্বাই আৰক্ষীয়ে।
যোৱা ১২ অক্টোবৰত দশেৰাৰ সন্ধিয়া পুত্ৰ জিছান ছিদ্দিকীৰ কাৰ্যালয়ৰ সন্মুখত গুলীয়াই হত্যা কৰা হৈছিল বাবা ছিদ্দিকীক। এই ঘটনাত মুম্বাই আৰক্ষীৰ অপৰাধ শাখাই কেইবাজনো লোকক গ্ৰেপ্তাৰ কৰিছে। আটাইকেইজনেই লৰেন্স বিষ্ণোই গেঙৰ সদস্য। ছ’চিয়েল মিডিয়াতো এই হত্যাকাণ্ডৰ দায়িত্ব স্বীকাৰ কৰিছে গেংটোৱে।
লগতে পঢ়কঃ কেনেকৈ সহজে ঘৰত নিগনিৰ উপদ্ৰৱৰ পৰা মুক্তি পাব? জানি লওক এই যাদুকৰী ঘৰুৱা কৌশল
ইফালে, বিগত কিছুদিনত প্ৰায় পাঁচশখন আন্তঃৰাষ্ট্ৰীয় আৰু ঘৰুৱা বিমানে বোমা ৰখাৰ ভাবুকি লাভ কৰিছে। তাৰ ফল ভোগ কৰিবলগীয়া হৈছে যাত্ৰীসকলে। পিছত অৱশ্যে নিৰাপত্তা সংস্থাসমূহে এই ভাবুকি সম্পূৰ্ণ মিছা বুলি অৱগত কৰে। বেছিভাগ ভাবুকি বাৰ্তাই আহিছিল ছ’চিয়েল মিডিয়াত।
