অৰাজক! দিল্লীৰ এখন চিকিৎসালয়ৰ জৰুৰীকালীন ৱাৰ্ডত প্ৰৱেশ কৰি জামিয়াৰ ছাত্ৰলৈ গুলী

Jamia student shot at inside Delhi hospital যুদ্ধক্ষেত্ৰ হৈ পৰিল দিল্লীৰ এখন চিকিৎসালয়! তাৰপিছতে চাঞ্চল্য বিয়পি পৰে। দক্ষিণ-পশ্চিম দিল্লীৰ জামিয়া নগৰ অঞ্চলৰ এখন ব্যক্তিগত চিকিৎসালয়ত জামিয়া মিলিয়া ইছলামিয়া বিশ্ববিদ্যালয়ৰ এজন ছাত্ৰক লক্ষ্য কৰি গুলীয়ায় আন এজন ছাত্ৰই। আহত ছাত্ৰজনক নমন চৌধুৰী বুলি চিনাক্ত কৰা হৈছে।

আৰক্ষীয়ে জনায় যে তেওঁলোকে বৃহস্পতিবাৰে নিশা প্ৰায় ৯ বজাত এটা ফোন পাইছিল যে জামিয়া মিলিয়া ইছলামিয়াৰ চৌহদত শিক্ষাৰ্থীৰ দুটা গোটৰ মাজত সংঘৰ্ষৰ সূত্ৰপাত ঘটিছে।

লগতে পঢ়ক: ভুৱা এনকাউণ্টাৰ গোচৰঃ গুৱাহাটী উচ্চ ন্যায়ালয়ত বিতং শপতনামা দাখিলত পুনৰ ব্যৰ্থ অসম চৰকাৰ

জানিব পৰা মতে, সেই সংঘৰ্ষ বিশ্ববিদ্যালয়খনৰ পুথিভঁৰালৰ ভিতৰত সংঘটিত হৈছিল। সেই সময়ত উত্তৰ প্ৰদেশৰ মিৰাটৰ পৰা অহা নমন চৌধুৰী আঘাতপ্ৰাপ্ত হয়। তেওঁক ততাতৈয়াকৈ হোলি ফেমিলি চিকিৎসালয়লৈ লৈ যোৱা হয়।

হাস্পাতলত নৌমান আলী নামৰ এজন ছাত্ৰ তেওঁক চাবলৈ আহে। তেওঁ নমনৰ বন্ধু। সেই সময়তে আন এজন ছাত্ৰ জালালে চিকিৎসালয়ৰ জৰুৰীকালীন ৱাৰ্ডৰ ভিতৰতে তেওঁৰ ওপৰত গুলীচালনা কৰে। লগে লগে চাৰিওফালে হাহাকাৰ লাগে।

আৰক্ষীয়ে জনোৱা মতে আলীয়ে মূৰত আঘাত পাইছে। তেওঁক এইমছৰ ট্ৰমা চেণ্টাৰত ভৰ্তি কৰোৱা হৈছে। অৱশ্যে তেওঁৰ আঘাত ইমান গুৰুতৰ নহয় বুলি কোৱা হৈছে। স্বাভাৱিকতে এনে ঘটনাই অঞ্চলটোত  চাঞ্চল্যৰ সৃষ্টি কৰিছে।

জামিয়া নগৰ আৰু নিউ ফ্ৰেণ্ডছ কলনি আৰক্ষী থানাৰ আৰক্ষীয়ে ঘটনাৰ এক তদন্ত আৰম্ভ কৰিছে। তদন্তকাৰী বিষয়াসকলে নৌমানৰ বিবৃতি সংগ্ৰহ কৰিবলৈ চেষ্টা কৰি আছে বুলি জানিব পৰা গৈছে। এইসংঘৰ্ষৰ কাৰণ কি সেয়া এতিয়াও জানিব পৰা হোৱা নাই।

লগতে পঢ়ক: Encounter Breaks Out in J&K: পুনৰ উপত্যকাত উত্তেজনা; তুমুল সংঘৰ্ষত কঁপি উঠিল শ্বোপিয়ান

উল্লেখ্য যে পিএফআইক শেহতীয়াকৈ নিষিদ্ধ কৰা হৈছে। ইয়াৰ পূৰ্বে নিয়া-ই সমগ্ৰ দেশতে দ্বিতীয় পৰ্যায়ৰ অভিযান আৰম্ভ কৰে। এই পৰিস্থিতিত জামিয়া মিলিয়া বিশ্ববিদ্যালয়ৰ কৰ্তৃপক্ষই শিক্ষাৰ্থী আৰু শিক্ষকসকলক এখন জাননী জাৰি কৰে। বিশ্ববিদ্যালয় চৌহদত যিকোনো ধৰণৰ সমাৱেশ বৰ্তমানৰ বাবে নিষিদ্ধ কৰা হৈছে। তাৰমাজতে এইবাৰ শিক্ষাৰ্থীৰ সংঘৰ্ষক লৈ উত্তপ্ত হৈ পৰিছে বিশ্ববিদ্যালয় চৌহদ।