জাপানৰ সংসদৰ নিম্ন সদনৰ নিৰ্বাচনত শাসকীয় লিবাৰেল ডেম’ক্ৰেটিক পাৰ্টিয়ে সংখ্যাগৰিষ্ঠতা হেৰুৱাইছে। দলটোৱে এককভাৱে যোৱাবাৰৰ তুলনাত বহু কম আসন লাভ কৰিছে। মিত্ৰজোঁট হিচাপেও এল ডি পিয়ে সংখ্যাগৰিষ্ঠতা ধৰি ৰাখিব পৰা নাই। ব্ৰিটিছ সংবাদ মাধ্যম বিবিচি নিউজে এই তথ্য প্ৰকাশ কৰিছে।
প্ৰতিবেদন অনুসৰি শেহতীয়া তথ্য মতে সংসদৰ নিম্ন সদনত এলডিপি-কোমেই মিত্ৰজোঁটে ২০৮খন আসন লাভ কৰিছে। আনহাতে, বিৰোধী দলসমূহৰ মুঠ আসনৰ সংখ্যা ২৩৫খন। সংসদত সংখ্যাগৰিষ্ঠতা লাভ কৰিবলৈ ২৩৩খন আসনৰ প্ৰয়োজন।
লগতে পঢ়কঃ ডুৰাণ্ডৰ পিছত লক্ষ্য আই এছ এল; পাৰ্থিৱ গগৈক লৈ সপোন দেখিছে প্ৰশিক্ষক পেড্ৰ’ বেনালিয়ে
দেওবাৰে স্থানীয় সময় অনুসৰি পুৱা ৭ বজাৰ পৰা আৰম্ভ হোৱা ভোটগ্ৰহণ নিশা ৮ বজালৈকে চলি থাকে। ২ কোটি ৯ লাখ ৫৫ হাজাৰ ভোটাৰে নিৰ্বাচনত ভোটদান কৰে। ভোটগ্ৰহণ শেষ হোৱাৰ পিছতেই ভোটগণনা আৰম্ভ হয়। এটা এটাকৈ ফলাফল ওলাবলৈ ধৰে।
জাপানৰ চৰকাৰী সংবাদ মাধ্যমৰ তথ্য অনুসৰি দেশৰ সংসদৰ নিম্ন সদনত ৪৬৫খন আসন আছে। সংখ্যাগৰিষ্ঠতা পাবলৈ ২৩৩খন আসনৰ প্ৰয়োজন। যোৱাবাৰ অকলে এলডিপিয়ে ২৪৭খন আসন লাভ কৰিছিল।
কিন্তু এইবাৰ মিত্ৰতা কৰিও এলডিপি আৰু কোমেইয়ে নিৰ্দিষ্ট আসন লাভ কৰা নাই। আনহাতে বিৰোধী দলসমূহৰ মুঠ আসনৰ সংখ্যা যোৱাবাৰৰ তুলনাত বহু বেছি। সৰ্বোত্তম স্থানত থকা মূল বিৰোধী দলটো হ’ল চিপিডি।
লগতে পঢ়কঃ ৰাজনীতিত প্ৰথম জনসভা তামিল অভিনেতা বিজয়ৰ; স্পষ্ট কৰিলে দলৰ লক্ষ্য, ষ্টেলিনৰ দলকো কটাক্ষ!
মন কৰিবলগীয়া যে ভোটৰ আনুষ্ঠানিক ফলাফলৰ জৰিয়তে ইছিবাই নিজৰ স্থান অক্ষুণ্ণ ৰাখিব পাৰিবনে নাই তাত সন্দেহ আছে। বিশ্লেষকসকলৰ মতে তেওঁ দ্বিতীয় বিশ্বযুদ্ধৰ পিছত জাপানৰ আটাইতকৈ কম সময়ৰ বাবো হোৱা প্ৰধানমন্ত্ৰী হ’ব পাৰে।
