মোডী চৰকাৰৰ সংখ্যালঘু বিৰোধী কোনো পদক্ষেপক সমৰ্থন নকৰে চন্দ্ৰবাবু নাইডুৱে। শেহতীয়াকৈ উত্থাপন হোৱা ৱাকফ বিল (ৱাকফ সংশোধনী বিধেয়ক ২০২৪) সন্দৰ্ভত টিডিপিৰ নেতা নবাব জানে এইদৰে কয়। তেওঁ কয় যে সংখ্যালঘু জনগোষ্ঠীৰ ক্ষতি হোৱা কোনো কাম টিডিপিৰ মুৰব্বীগৰাকীয়ে সমৰ্থন নকৰে।
দেওবাৰে হায়দৰাবাদৰ ইন্দিৰা গান্ধী ইনড’ৰ ষ্টেডিয়ামত জমিয়ত-উলেমা-হিন্দৰ উদ্যোগত আয়োজিত এখন ৰাজহুৱা সভাত এই মন্তব্য কৰে টিডিপিৰ নেতাগৰাকীয়ে।
তৃতীয়বাৰৰ বাবে মিত্ৰজোঁটৰ চৰকাৰ গঢ়ি ক্ষমতালৈ অহাৰ পিছত প্ৰধানমন্ত্ৰী নৰেন্দ্ৰ মোডীয়ে ৱাকফ সংশোধনী বিধেয়ক ২০২৪ গৃহীত কৰিবলৈ উঠিপৰি লাগিছে। কিন্তু বিজেপিয়ে পূৰ্বৰ দৰে সংখ্যাগৰিষ্ঠতা নোপোৱাৰ বাবে অকলে সেয়া কৰিব নোৱাৰে। সেয়ে, মিত্ৰতাৰ অংশীদাৰ টিডিপি আৰু জেডিইউৰ সমৰ্থন অবিহনে সেয়া সম্ভৱ নহয়। অৱশ্যে টিডিপিৰ দৰে এনডিএৰ অংশীদাৰ দলে আৰম্ভণিৰে পৰাই এই বিধেয়কখনক সমৰ্থন কৰিবলৈ অনিচ্ছুক হৈ আহিছে।
লগতে পঢ়কঃ নিয়ন্ত্ৰণ হেৰুৱাই খাৱৈত পৰিল যাত্ৰী ভৰ্তি বাছ; কমেও ২২ জনৰ মৃত্যু, আহত আন বহুতো
আনকি নীতিশৰ জে ডি ইউয়েও বিহাৰ নিৰ্বাচনৰ পূৰ্বে সংখ্যালঘু ভোট বেংকৰ কথা মনত ৰাখি সমৰ্থনৰ কোনো আশ্বাস দিয়া নাই। কাৰণ দেশৰ সংখ্যালঘু সংগঠনসমূহে ইতিমধ্যে এই বিধেয়কখনৰ বিৰোধিতা কৰিবলৈ আৰম্ভ কৰিছে। ইফালে ৰাজনৈতিক মহলে ভাবে যে এইজন টিডিপি নেতাৰ কথাই বিজেপিৰ সমস্যা বৃদ্ধি কৰিছে।
দেওবাৰৰ ৰাজহুৱা সভাত টিডিপি নেতাগৰাকীয়ে কয় যে, ‘’চন্দ্ৰবাবু নাইডুৰ অধীনত ৰাজ্যত সংখ্যালঘুসকলৰ সুৰক্ষা আৰু স্বাৰ্থ নিশ্চিত হৈছে। আমাৰ মুখ্যমন্ত্ৰী এজন ধৰ্মনিৰপেক্ষ মানসিকতাৰ ব্যক্তি। তেওঁ আমাৰ কোনো ক্ষতি হ’বলৈ নিদিয়ে। অকল চন্দ্ৰবাবুৰ বাবেহে বিধেয়কখন যুটীয়া সংসদীয় সমিতিলৈ আলোচনাৰ বাবে প্ৰেৰণ কৰিবলৈ সক্ষম হৈছিল।”
যোৱা আগষ্ট মাহত কেন্দ্ৰই সংসদত ‘ৱাকফ সংশোধনী বিধেয়ক ২০২৪’ উত্থাপন কৰিছিল যাতে কেন্দ্ৰই ৱাকফৰ সম্পত্তিসমূহ ‘পৰ্যবেক্ষণ’ কৰিব পাৰে। কিন্তু কংগ্ৰেছ আৰু দেশৰ আন বিৰোধী দলসমূহে সেই বিধেয়কত দেশৰ সংখ্যালঘু জনগোষ্ঠীৰ স্বাৰ্থৰ ক্ষতি হ’ব পাৰে সৰৱ হয়।
লগতে পঢ়কঃ কিশোৰৰ পেটত ওলাল ঘড়ীৰ বেটাৰী, ব্লেডকে ধৰি ৫৬ টুকুৰা ধাতু, দেখি স্তম্ভিত চিকিৎসক
সংখ্যালঘু ভোটৰ কথা মনত ৰাখি এন ডি এৰ দুটা অংশীদাৰ টিডিপি আৰু জেডিইউৰ দৰে দলে বিজেপিক সমৰ্থন কৰাৰ পৰা বিৰত থাকিল। ফলত মোডী চৰকাৰে হেঁচাত পৰি বিধেয়কখন জেপিচি বা যুটীয়া সংসদীয় সমিতিলৈ প্ৰেৰণ কৰিবলৈ বাধ্য হয়। ফলত ৰাজনৈতিক মহলে অনুভৱ কৰে যে টিডিপিৰ এই ধৰণৰ বিৰোধিতাই মোডী মন্ত্ৰীসভাত চাপ বৃদ্ধি কৰিছে।
