জম্মু-কাশ্মীৰত পুনৰ সংঘটিত হৈছে সংঘৰ্ষ। শনিবাৰে জম্মু-কাশ্মীৰৰ অনন্তনাগ জিলাত উগ্ৰপন্থী আৰু নিৰাপত্তাৰক্ষীৰ মাজত সংঘৰ্ষ হয়। জানিব পৰা মতে এই সংঘৰ্ষত দুজন উগ্ৰপন্থী নিহত হৈছে। পুৱা শ্ৰীনগৰৰ খানিয়াৰ অঞ্চলত নিৰাপত্তাৰক্ষী আৰু উগ্ৰপন্থীৰ এটা দলৰ মাজত সংঘৰ্ষ সংঘটিত হোৱাৰ কেইঘন্টামান পিছতে এই সংঘৰ্ষ ঘটে।
গোপন সূত্ৰৰ জৰিয়তে উগ্ৰপন্থীৰ উপস্থিতিৰ তথ্য লাভ কৰি নিৰাপত্তাৰক্ষীয়ে অঞ্চলটোত তালাচী অভিযান আৰম্ভ কৰে। হঠাৎ উগ্ৰপন্থীয়ে তেওঁলোকৰ ওপৰত গুলীচালনা আৰম্ভ কৰাত নিৰাপত্তাৰক্ষীয়েও প্ৰত্যুত্তৰত গুলী চলায়।
কাশ্মীৰ সংমণ্ডলৰ আৰক্ষীয়ে ছ’চিয়েল মিডিয়াত প্ৰকাশ কৰা তথ্য অনুসৰি আৰক্ষী আৰু নিৰাপত্তাৰক্ষীয়ে যৌথভাৱে অভিযান চলাই উগ্ৰপন্থী দুজনক নিহত কৰে। বৰ্তমানো সমগ্ৰ অঞ্চলটো ঘেৰাও কৰি ৰখা হৈছে।
লগতে পঢ়কঃ বিজেপিৰ পৰৱৰ্তী সভাপতি হ’ব নেকি সঞ্জয় যোশী? সংঘৰ কৌশলক লৈ বিপাঙত মোডী-শ্বাহ!
তালাচীৰ সময়ত উগ্ৰপন্থীয়ে বাৰে বাৰে নিজৰ স্থান সলনি কৰি থকা বুলিও সূত্ৰৰ জৰিয়তে খবৰ পোৱা গৈছে। অৱশ্যে এই পৰ্যন্ত কোনো লোক হতাহতৰ খবৰ পোৱা নাই। স্থানীয় বাসিন্দাৰ সুৰক্ষাৰ কথা মনত ৰাখি সতৰ্কবাণী জাৰি কৰা হৈছে।
ইফালে, শেহতীয়াকৈ কাশ্মীৰত সংঘটিত সন্ত্ৰাসবাদী আক্ৰমণত আহত হয় দুজন প্ৰব্ৰজিত শ্ৰমিক। শুকুৰবাৰে জম্মু-কাশ্মীৰৰ বদগামৰ মাঝামা অঞ্চলত উগ্ৰপন্থীৰ গুলীচালনাত উত্তৰ প্ৰদেশৰ দুজন শ্ৰমিক আহত হৈছিল। দুয়োজনে চিকিৎসালয়ত চিকিৎসাধীন হৈ আছে আৰু তেওঁলোকৰ অৱস্থা সুস্থিৰ বুলি চিকিৎসকে জনাইছে। যোৱা দুসপ্তাহত চাৰিবাৰকৈ প্ৰব্ৰজিত শ্ৰমিক সন্ত্ৰাসবাদী আক্ৰমণৰ লক্ষ্য হৈ পৰিছে।
লগতে পঢ়কঃ আৰক্ষীৰ স্ক্যানাৰত লৰেন্স বিষ্ণোইৰ ভাতৃ আনমোল; আমেৰিকাৰ পৰা প্ৰত্যাৰ্পণৰ প্ৰক্ৰিয়া আৰম্ভ
আৰক্ষীৰ মতে, নিহত উগ্ৰপন্থী দুজনৰ এজন দক্ষিণ কাশ্মীৰৰ কুলগামৰ যুৱক। ২০২৩ চনত তেওঁ উগ্ৰপন্থী সংগঠনটোত যোগদান কৰিছিল। আন এজন উগ্ৰপন্থী পাকিস্তানৰ বুলি জানিব পৰা গৈছে।
