ছিৰিয়াত ইৰাণৰ সৈতে সংশ্লিষ্ট দুটা সশস্ত্ৰ শিৱিৰত আক্ৰমণ চলোৱাৰ দাবী কৰিছে আমেৰিকাই। আমেৰিকাৰ প্ৰতিৰক্ষা মুখ্য কাৰ্যালয় পেন্টাগনে বৃহস্পতিবাৰে এই দাবী উত্থাপন কৰে। ইৰাক আৰু ছিৰিয়াত আমেৰিকাৰ বাহিনীক আক্ৰমণ কৰাৰ পিছত ইছলামিক ৰিভল্যুচনেৰী গাৰ্ড কৰ্পছ আৰু ইৰাণ সমৰ্থিত গোটে এই শিৱিৰসমূহ ব্যৱহাৰ কৰিছিল।
বৃহস্পতিবাৰে আমেৰিকাৰ প্ৰতিৰক্ষা সচিব লয়ড অষ্টিনে এক বিবৃতিত কয় যে ১৭ অক্টোবৰত ইৰাক আৰু ছিৰিয়াত ইৰাণ সমৰ্থিত সশস্ত্ৰ সংগঠনে আমেৰিকাৰ সৈন্যৰ ওপৰত ধাৰাবাহিকভাৱে আক্ৰমণ কৰাৰ প্ৰতিক্ৰিয়া স্বৰূপে এই আক্ৰমণ চলোৱা হৈছে।
হোৱাইট হাউছৰ ৰাষ্ট্ৰীয় নিৰাপত্তা পৰিষদৰ মুখপাত্ৰই পূৰ্বে সকীয়াই দিছিল যে ৱাশ্বিংটনে আমেৰিকাৰ বাহিনীৰ ওপৰত আক্ৰমণৰ প্ৰতিক্ৰিয়া প্ৰকাশ কৰিব।
লগতে পঢ়কঃ ২০২৪-ৰ লোকসভা নিৰ্বাচনত বিজেপিক উৎখাতৰ লক্ষ্য; ঐক্যবদ্ধভাৱে কাম কৰাৰ সংকল্প ৰাজ্যৰ সন্মিলিত বিৰোধীৰ
বৃহস্পতিবাৰে আমেৰিকাৰ প্ৰতিৰক্ষা বিভাগে প্ৰকাশ কৰা অনুসৰি চলিত মাহত ইৰাক আৰু ছিৰিয়াত আমেৰিকা আৰু মিত্ৰশক্তিৰ ওপৰত কমেও ১৬ বাৰ আক্ৰমণ কৰা হৈছে।
৭ অক্টোবৰত ইজৰাইল আৰু পেলেষ্টাইনৰ মাজত পুনৰ আৰম্ভ হোৱা সংঘাতৰ পিছত মধ্যপ্ৰাচ্যত আমেৰিকাৰ বাহিনীৰ ওপৰত আক্ৰমণ বৃদ্ধি পাইছে। ৭ অক্টোবৰত পেলেষ্টাইনৰ সন্ত্ৰাসবাদী সংগঠন হামাছে ইজৰাইলৰ ওপৰত অভূতপূৰ্ব আক্ৰমণ চলাইছিল। ইজৰাইলৰ সেনাই দাবী কৰিছে যে ইজৰাইলত হামাছৰ আক্ৰমণত ১৪০০ৰো অধিক লোক নিহত হৈছে।
পেলেষ্টাইন কৰ্তৃপক্ষই জনোৱা মতে, গাজাত ইজৰাইলৰ বিমান আক্ৰমণত ৭ হাজাৰৰো অধিক লোক নিহত হৈছে।
লগতে পঢ়কঃআদৰ্শ আচৰণ বিধি উলংঘা; মুখ্যমন্ত্ৰী হিমন্ত বিশ্ব শৰ্মাক কাৰণ দৰ্শোৱাৰ জাননী নিৰ্বাচন আয়োগৰ
বুধবাৰে বাইডেনে কয় যে তেওঁ ইৰাণৰ শীৰ্ষ নেতা আয়াতুল্লাহ আলী খামেনেইক মধ্যপ্ৰাচ্যত আমেৰিকাৰ বাহিনীৰ ওপৰত আক্ৰমণৰ সন্দৰ্ভত পোনপটীয়াকৈ সকীয়াই দিছে। বাইডেনে সাংবাদিকৰ আগত কয়, ‘মই আয়াতুল্লাহক সকীয়াই দিছো যে যদি তেওঁলোকে এই সৈন্যক আক্ৰমণ কৰি থাকে তেন্তে তেওঁলোকৰ বিৰুদ্ধে প্ৰতিশোধ লোৱা হ’ব। ইয়াৰ বাবে তেওঁ সাজু হোৱা উচিত।‘
ৱাশ্বিংটন আৰু তেহৰাণৰ আনুষ্ঠানিক কূটনৈতিক সম্পৰ্ক নাই। কিন্তু ইৰাণলৈ এই বাৰ্তা কেনেকৈ পঠোৱা হৈছে সেই কথা বাইডেনে কোৱা নাই।
লগতে পঢ়কঃহোৰাহোৰে বাঢ়িছে পিঁয়াজৰ দাম; অসহায় ৰান্ধনি, মধ্যবিত্তৰ মূৰত হাত!
ইৰাণৰ ৰাষ্ট্ৰপতি ইব্ৰাহিম ৰাইছিৰ সহকাৰী মহম্মদ জামছিদীয়ে ছ’চিয়েল মিডিয়াত পোষ্ট কৰি দাবী কৰে যে আমেৰিকাৰ এই বাৰ্তা ইছলামিক বিপ্লৱৰ নেতা বা ইৰাণৰ কোনো লোকৰ ওচৰলৈ যোৱা নাছিল।
